Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 52 Hüküm no: 15 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. Mustafa’nın, eşi Hasan Efendi b. Abdullah’ın hayatta iken kendisine ödemediğini iddia ettiği mehr-i müsemmasının, mehr-i misli olduğuna hükmolunduğu Husûs-ı âti’l-beyânın mahâllinde istimâ‘ ve tahrîri içün savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Çavuş Kasım mahallesinde sâkin iken bundan akdem vefât eden Hasan Efendi b. Abdullah’ın hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan işbu râfi‘atü’l-kitâb Emine Hatun bt. Mustafa meclis-i ma‘kūd-ı mezkûrda tashîhan li’d-da‘vâ müteveffâ-yı mezbûrun sulbiye sagīre kızı Hadice’ye vasî nasb olunan Halil Efendi b. Mustafa mahzarında üzerine da‘vâ ve takrîr-i kelâm edüp zevcim müteveffâ-yı mezbûr Hasan Efendi b. Abdullah b. Abdurrahman fevtinden altı sene mukaddem tezvîc murâd etdikde elli guruş mehir tesmiyesiyle beni tezvîc ve kabûl edüp akd-i nikâh beynimizde kāim iken meblağ-ı mezbûru kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘iye-i mezbûrenin <> mehr-i müsemmâsına beyyinesi olmamağla mehr-i misline beyyine taleb olundukda udûl-i ahrâr-ı ricâl-i Müslimînden mahalle-i mezbûre sâkinlerinden Halil Efendi b. Derviş Ali ve Abdullah Ağa b. Mehmed ve Salih Çelebi b. Süleyman nâm kimesneler li-ecli’ş-şehâde meclis-i ma‘kūd-ı mezkûra hâzırûn olup isre’l-istişhâd, fi’l-hakīka müdde‘iye-i mezbûre Emine Hatun’un müdde‘âsı olan elli guruş neseben ve sinnen ve cemâlen mehr-i müsemmâsına müsâvî ve mümâsil ve müdânîdir; biz bu husûsa bu vech üzere şâhidleriz; şehâdet dahi ederiz deyü her biri edâ-i şehâdet-i şer‘iye etdikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr el-Hâc Mustafa ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâdis min-Cumâdelâhire sene 1147. Şuhûdü’l-hâl: Ali Efendi b. Seyfullah, el-Hâc Ali b. İbrahim, Hasan Çelebi b. Yusuf, Ahmed Efendi b. Mustafa, Salih Çelebi b. Süleyman, Ahmed Ağa b. Ali.