Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 57 Hüküm no: 18 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi b. Hasan Efendi’nin küçük oğlu Mehmed’e nafaka tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Servi mahallesinde sâkin iken bundan akdem vefât eden Hüseyin Efendi b. Hasan Efendi’nin sulbî sagīr oğlu Mehmed’in vâlidesi ve tesviye-i umûruna vasîsi olan işbu râfi‘atü’l-kitâb Afîfe Hatun bt. Mehmed meclis-i şer‘-i enverde takrîr-i kelâm ve ta‘bîr ani’l-merâm edüp vasîsi olduğum sagīr-i mezbûrun nafaka ve kisve-bahâya eşedd-i ihtiyâcı olmağla bâ-berât-ı âlî-şân mutasarrıf olduğu vazîfesinden kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasîyy-i mezbûrenin kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīr-i mezbûrun bâ-berât-ı âlî-şân mutasarrıf olduğu vazîfesinden beher yevm on sekizer akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisve-bahâsına harc ve sarfa ve lede’l-iktizâ istidâneye ve inde’z-zafer mâlına rücû‘a vasîyy-i mezbûreye izin vermeğin [mâ-vaka‘a] bi’t-taleb ketb olundu. Fî 18 Cumâdelâhire sene [1]147. Eş-şâhidûnü’s-sâbıkūn.