Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 57 Hüküm no: 19 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nifos köyü ahalisinden Kabasakal Boşko v. Uberoto’nun Davutpaşa Mahallesi ahalisinden Ali Beşe b. Hüseyin’e borcu bulunduğuna hükmolunduğu Mahmiye-i İstanbul’da Davudpaşa mahallesinde sâkin işbu râfi‘u<<’s-sifr>>’l-kitâb Ali Beşe b. Hüseyin meclis-i şer‘-i şerîf-i enverde Havâss-ı Refî‘a kazâsına tâbi‘ Nifos nâm karyede mütemekkin iken bundan akdem hâlik olan Kabasakal Boşko v. Uberoto’nun zâhirde vâris-i ma‘rûfu olmayıp terekesi cânib-i Beytü’l-mâl’e âid olmağın karye-i mezbûrenin Beytü’l-mâlini kabza me’mûr olup tereke-i hâlik-i mersûma bi’l-emâne vâzı‘u’l-yed olan fahrü’l-akrân el-Hâc Mustafa Ağa b. Mehmed mahzarında üzerine da‘vâ ve takrîr-i kelâm edüp işbu yedimde olan deyn temessüğü nâtık olduğu üzere hâlik-i mersûm Kabasakal Boşko v. Uberoto v. Nikola zimmetinde cihet-i karzdan elli guruş hakkım olup hatta hâlik-i mersûm hâl-i hayatında ve kemâl-i sıhhatinde helâkinden üç ay mukaddem meblağ-ı mezbûr zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edüp kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mersûmdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden mahalle-i mezbûre sâkinlerinden es-Seyyid Mustafa b. Ebûbekir ve İbrahim Çelebi b. Osman nâm kimesneler li-ecli’ş-şehâde meclis-i şer‘a hâzırân olup isre’l-istişhâd, fi’l-hakīka işbu müdde‘î-i mesfûrun yedinde olan deyn temessüğü nâtık olduğu üzere hâlik-i mezbûr Kabasakal Boşko v. Uberoto v. Nikola zimmetinde cihet-i karzdan işbu müdde‘î-i mezbûr Ali Beşe’nin elli guruş hakkı olup hatta hâlik-i mersûm hâl-i hayatında helâkinden üç ay mukaddem meblağ-ı mezbûr elli guruş müdde‘î-i mezbûra zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz; şehâdet dahi ederiz deyü her biri edâ-i şehâdet-i şer‘iye etdikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi [7a] ‘ş-şer‘î mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’l-işrîn min-Cumâdelâhire li-seneti seb‘a ve erba‘în ve miete ve elf. Şuhûdü’l-hâl: Mustafa Efendi b. Hüseyin, Ahmed Efendi b. Mustafa Efendi, es-Seyyid Mehmed b. es-Seyyid Mustafa, el-Hâc Yusuf b. Abdullah.