Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 59 Hüküm no: 22 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Çivizâde Ataullah Efendi’nin oğlu Müderris Abdülbaki Efendi’nin, kız kardeşleri ile bölüştükleri evin kendisine ait kısmını Desterecizâde Mehmed Efendi b. Ali’ye vefaen sattığı Husûs-ı âti’l-beyânın mahâllinde ketb ü tahrîri içün savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Câmi‘-i kebîr mahallesi sükkânından fahrü’l-müderrisîni’l-kirâm Abdülbaki Efendi b. el-merhûm Çivizâde Ataullah Efendi’nin menziline varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde mûmâ-ileyh Abdülbaki Efendi meclis-i ma‘kūd-ı mezkûrda hemşîreleri Ümmügülsüm ve Zeyneb Hanım hâzıratân oldukları hâlde işbu bâ‘isü’l-kitâbi’l-müstetâb Desterecizâde demekle ma‘rûf sa‘âdetlü Mehmed Efendi b. Ali mahzarında ikrâr ve takrîr-i kelâm edüp mahalle-i mezbûrede vâki‘ bir tarafdan müşârün-ileyh Desterecizâde Mehmed Efendi menzili ve bir tarafdan sâhil-i buhayra ve bir tarafdan ba‘zan müteveffâ Halil Efendi vereseleri mülkü ve ba‘zan Şeyhülislâm-ı esbak Abdullah Efendi hazretleri menzili ve bir tarafdan tarîk-ı âm ile mahdûd büyût-ı adîdeyi muhtevî mülk menzilden yedi sehim i‘tibârıyla beş sehmi ırsen ve şirâen benim mülküm ve iki sehmi kız karındaşlarım mezbûretân Ümmügülsüm ve Rukiye [Zeyneb] hanımların ırsen mülkleri olup mezbûretân Ümmügülsüm ve Rukiye [Zeyneb] hanım[lar] kendilerinin iki sehim hissesi mukābelesinde menzil-i mezbûrdan bir tarafdan ba‘zan Seyyid Kasım menzili ve ba‘zan Halil Efendi veresesi menzili ve bir tarafdan Abdullah Efendi menzili ve bir tarafdan benim hisseme ifrâz olunan menzil ve bir tarafdan sokak kapısına mürûr eden tarîk ile mahdûd üç oda ve dehliz ve tahtında havlu[yu] müştemil mahalli kabûl edüp alâmet-i fâsıla vaz‘ından sonra benim altmış beş sehim hisseme ta‘yîn ve tahsîs olunan menzilden Desterecizâde tarafında vâki‘ üç bâb fevkānî oda ve bir kilâr ve bir hazîne odası ve iki bâb tahtânî odayı hâvî müfrez mahalli mûmâ-ileyh Mehmed Efendi’ye bey‘ bi’l-vefâ tarîkı üzere ba‘de’t-tahliye sekiz yüz altmış dört guruşa bey‘ ve teslîm ol dahi ber-vech-i muharrer iştirâ ve tesellüm ve kabûl eylediğinden sonra meblağ-ı mezbûr sekiz yüz altmış dört guruşu <> mûmâ-ileyh Mehmed Efendi yedinden tamamen ahz u kabz edüp lâkin menzil-i mahdûd-ı mezkûr hakīkatde rehin ve semen-i mezkûr zimmetimde deyn olmağla meblağ-ı deyn-i mezkûru târih-i kitâbdan her ne vakitde kendine tamamen edâ ve teslîm eylediğimde mûmâ-ileyh Mehmed Efendi dahi menzil-i mahdûd-ı mezkûru bana red ve teslîme ta‘ahhüd eyledi dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çuka[dâr] el-Hâc Mehmed ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 15 min-Cumâdelâhire sene 1147. Şuhûdü’l-hâl: Fahrü’l-kuzât Ahmed Efendi b. Bektaş, Ahmed Efendi b. Mustafa Efendi, es-Seyyid Halil Efendi b. Mustafa, Yahya Efendi b. İmâm-ı Servi, el-Hâc Ahmed Efendi el-imâm.