Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 59 Hüküm no: 21 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin, evini istiğlal yoluyla merhum Çorbacı Mustafa Ağa’nın yetiminin vasîsi Mehmed Odabaşı b. Hüseyin’e sattığı Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Ulucababa mahallesinde sâkin Mustafa Çelebi b. ( ) meclis-i şer‘-i şerîf-i enverde merhûm Çorbacı Mustafa Ağa’nın yetîminin vasîsi olan işbu râfi‘u’l-kitâb Mehmed Odabaşı b. Hüseyin mahzarında ikrâr ve takrîr-i kelâm edüp yedimde mülk ve hakkım olup mahalle-i mezbûrede vâki‘ bir tarafdan Şemsi Ağa mülkü ve bir tarafdan Kahramanzâde mülkü ve bir tarafdan İsmail Çelebi mülkü ve bir tarafdan tarîk-ı hâs ile mahdûd büyût-ı adîdeyi muhtevî mülk menzilimi cemî‘ tevâbi‘ ve levâhıkı ile bi-tarîkı’l-istiğlâl dört yüz beş guruşa vasîyy-i mezbûr Mehmed Odabaşı’ya bey‘ ve teslîm edüp ol dahi ber-vech-i muharrer iştirâ ve tesellüm ve kabz ve kabûl eyledikden sonra semeni olan meblağ-ı mezbûr dört yüz beş guruşu vasîyy-i mezbûr yedinden tamamen alıp kabz eyleyip yine vasîyy-i mezbûr menzil-i mahdûd-ı mezkûru ba‘de’t-tahliyeti’ş-şer‘î ve’t-takābuzı’l-mer‘î târih-i kitâbdan bir sene tamamına değin altmış guruş otuz paraya bana îcâr ve teslîm edüp ben dahi ber-vech-i muharrer istîcâr ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Cumâdelûlâ li-seneti seb‘a ve erba‘în ve miete ve elf. Şuhûdü’l-hâl: Hâfız İbrahim Efendi b. Çolak?, Mustafa Efendi b. Hasan, Ahmed Efendi b. Mustafa, es-Seyyid Mehmed b. es-Seyyid Mustafa, İsa Çelebi b. Mehmed Ali Çelebi, Kurd Çelebi b. İbrahim.