Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 61 Hüküm no: 24 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Ahmed’in küçük oğlu Mustafa’ya nafaka tayini Havâss-ı Refî‘a kazâsı muzâfâtından Hasköy’de Keçeci el-Hâc Mehmed mahallesinde sâkin iken bundan akdem vefât eden el-Hâc Ali b. Ahmed’in sulbî sagīr oğlu Mustafa’nın vâlidesi ve tesviye-i umûruna kıbel-i şer‘den mansûbe vasîsi olan işbu râfi‘atü’l-kitâb Âtike Hatun bt. Mustafa meclis-i şer‘-i şerîf-i enverde takrîr-i kelâm <> ve ta‘bîr ani’l-merâm edüp vasîsi olduğum sagīr-i mezbûrun nafaka ve kisve-bahâya eşedd-i ihtiyâcı olmağla babası müteveffâ-yı mezbûrdan müntakıl mâlından kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasîyy-i mezbûrun kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i [8b] muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīr-i mezbûrun nafaka ve kisve-bahâsı’çün babası müteveffâ-yı mezbûrdan müntakıl mâlından yevmî üçer para nafaka ve kisve-bahâ farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisve-bahâsına harc ü sarfa ve lede’l-iktizâ istidâneye ve inde’z-zafer mâlına rücû‘a vasîyy-i mezbûra izin vermeğin mâ-vaka‘a bi’t-taleb ketb olundu. Fî<<’l-yevmi>> gurreti Muharremi’l-harâm sene 1147. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, es-Seyyid Mehmed b. es-Seyyid Mustafa, Ali Ağa b. Abdullah, Mehmed Ağa b. Abdullah, el-Hâc Süleyman b., diğer Süleyman, Mehmed Beşe b. Kalafâtî.