Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 136 Hüküm no: 163 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Donanma-i hümayun için Kocaeli civarından kesilecek keresteler hakkındaki emre muhalefet eden Hüseyin Ağa ve Osman Yazıcı isimli şahısların Bursa’ya sürgüne gönderildiği Akzâ kuzâti’l-müslimîn evlâ vülâti’l-muvahhidîn ma‘denü’l-fezâili ve’l-yakīn râfi‘ü a‘lâmi’ş-şerî‘ati ve’d-dîn vârisü ulûmi’l-enbiyâ’i ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ Bursa kādısı -zîde fezâiluhû- ve kıdvetü’n-nüvvâbi’l-müteşerri‘în Kartal Nâibi mevlânâ ( ) -zîde ilmühû- tevkī‘-i refî‘-i hümâyûn vâsıl olıcak ma‘lûm ola ki tersâne-i âmiremde inşâsı tertîb olunan ince donanma-i hümâyûnum sefâini lâzimesi’çün Kocaeli sancağında vâki‘ kazâ ve nevâhîden kat‘ ve nakle fermânım olan ecnâs-ı kerestenin bir an akdem ve bir sâ‘at mukaddem kat‘ ve nakli bâbında müte‘addid evâmir-i şerîfem sâdır olmuş iken livâ-i mezbûrda Kartal kasabası sâkinlerinden Hüseyin Ağa ve Osman Yazıcı demekle ma‘rûf kimesneler evâmir-i aliyyeme adem-i itâ‘at birle ahâlî-i vilâyeti tahrîk ve kerestenin ta‘tîlini mûcib olur harekâta mübâderet eylediklerine binâen te’dîbi ve gûş-mâllerini îcâb etmeğin sâdır olan fermân-ı âlî mûcebince merkūmân çavuş mübâşereti ile ahz ve Bursa’ya irsâl ve alâ-tarîkı’n-nefy Bursa’da meks [ve] ikāmet etdirdüp ıtlâkları’çün emr-i şerîfim sâdır olmadıkça bir hatve hareketlerine ruhsat verilmemek içün Dîvân-ı hümâyûnum tarafından emr-i şerîfim sudûrunu iftihârü’l-emâcid ve’l-ekârim başdefterdârım vekîli el-Hâc Ömer Vahid -dâme uluvvuhû- i‘lâm etmeğin i‘lâmı mûcebince merkūmân çavuş mübâşeretiyle ahz ve Bursa’ya menfiyyen irsâl ve şurût-ı mezkûre ile ikāmet etdirilmek fermânım olmağın imdi sen ki Kartal nâibi mevlânâ-yı mûmâ-ileyhsin mezbûrânı ta‘yîn olunan çavuş mübâşeretiyle ahz ve Bursa’ya irsâl ve sen ki Bursa kādısı mevlânâ-yı mûmâ-ileyhsin vusûllerinde Bursa’da menfiyyen meks ü ikāmet etdirdüp ıtlâkları’çün emr-i şerîfim sâdır olmadıkça bir hatve mahâll-i âhara hareketlerine ruhsatdan mübâ‘adet eylemen bâbında fermânım sâdır olmuşdur buyurdum ki Dîvân-ı hümâyûnum çavuşlarından kıdvetü’l-emâsil ve’l-akrân Hasan Çavuş -zîde kadruhû- vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla âmil olup hilâfından gāyetü’l-gāye tehâşî ve mücânebet eyleyesiz şöyle bilesiz alâmet-i şerîfe i‘timâd kılasız. Tahrîren fi’l-evâhiri şehri Şevvâli’l-mükerrem li-sene selâse ve semânîn ve mi’ete ve elf.