Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 67 Hüküm no: 31 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun bt. Mehmed’in küçük kızı Sâliha’ya nafaka tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Ali Paşa-yı Cedîd mahallesinde sâkine iken bundan akdem vefât eden Emetullah Hatun bt. el-Hâc Mehmed’in sadriye sagīre kızı Sâliha’nın babası ve tesviye-i umûruna kıbel-i şer‘den mansûb vasîsi olan işbu râfi‘u’l-kitâb Osman Çelebi b. Mustafa meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasîsi olduğum sagīre-i mezbûrenin nafaka ve kisveye eşedd-i ihtiyâcı olmağla vâlidesi müteveffât-ı mezbûreden müntakıl mâlından kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasîyy-i mezbûrun kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer <> olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīre-i mezbûrenin vâlidesi müteveffât-ı mezbûreden müntakıl mâlından beher yevm dörder akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīre-i mezbûrenin nafaka ve kisve-bahâsına harc ve sarfa ve lede’l-iktizâ istidâneye ve inde’z-zafer mâlına rücû‘a vasîyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’s-sânî-aşer min-Recebi’l-ferd sene 1147. Şuhûdü’l-hâl: Eş-şâhidûnü’s-sâbıkūn.