Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 70 Hüküm no: 33 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi b. Yusuf’un küçük çocukları Mustafa ve Hatice’nin vasîleri Mehmed Bey b. Yusuf’un, vasîliğin gereklerini yerine getirmediği için azli ve yerine yeni vasî ve nafaka tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Bıçakcı mahallesinde sâkin iken bundan akdem vefât eden Hasan Çelebi b. Yusuf’un sulbî sagīr oğlu Mustafa ile sulbiye sagīre kızı Hadice’nin ammileri ve tesviye-i emirlerine vasîleri olan Mehmed Bey b. Yusuf bizzât umûr-ı vesâyet-i mezkûreyi ikāmetden imtinâ‘ edüp sagīrân-ı mezbûrânın vâlideleri olan işbu râfi‘atü’l-kitâb Havva Hatun bt. Muslu umûr-ı vesâyeti ikāmeti kādire idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīrân-ı mezbûrânın tesviye-i emirlerine vasî nasb ve ta‘yîn buyurup ol dahi vesâyet-i mezbûreyi kabûl ve merâsimini edâya müte‘ahhid oldukdan sonra hâkim-i mûmâ-ileyh hazretleri vasiyye-i mezbûre Havva Hatun talebiyle sagīrân-ı mezbûrânın her birine yevmî dörder akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīrân-ı mezbûrânın nafaka ve kisve-bahâlarına harc ve sarfa ve lede’l-iktizâ istidâneye ve inde’z-zafer mâllarına rücû‘a vasîyy-i mezbûreye izin vermeğin mâ-vaka‘a bi’t-taleb ketb olundu. Fî 3 min-Cumâdelûlâ sene 1147. Şuhûdü’l-hâl: Mustafa Efendi b. Hüseyin, el-Hâc Mehmed Ağa b. Ali, es-Seyyid Mehmed b. es-Seyyid Mustafa, Mehmed Bey b. Ali, Yusuf Çelebi b. Abdullah.