Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 78 Hüküm no: 40 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tokat’ta vefat eden Osman Beşe b. Ömer’in evinin Osman Ağa b. Ahmed’e satıldığı Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Ulucababa mahallesi ahâlîsinden iken düyûnu terekesinden ezyed olduğu hâlde bundan akdem vilâyet-i Anadolu’da Tokat kasabasında müsâfiren vefât eden Osman Beşe b. Ömer’in verâseti zevce-i menkûha-i metrûkesi Zeyneb Hatun bt. Abdullah ile sulbiye sagīre kızı Hanife’ye münhasıra olup ba‘dehû mezbûre Hanife dahi vefât edüp verâseti hasran vâlidesi mezbûre Zeyneb Hatun’a isâbet eylediği şer‘an zâhir ve müte‘ayyin oldukdan sonra zâtı ta‘rîf-i şer‘î ile mu‘arrefe olan mezbûre Zeyneb Hatun meclis-i <> şer‘-i şerîf-i enverde işbu râfi‘u’l-kitâb Osman Ağa b. el-Hâc Ahmed mahzarında ikrâr ve takrîr-i kelâm edüp zevcim müteveffâ-yı mezbûr Osman Beşe’nin tereke-i menkūlesi semeni düyûn-ı müsbetesine vefâ etmeyip emlâkinin bey‘i lâzım gelmeğin müteveffâ-yı mezbûrun ile’l-vefât yedinde mülk ve hakkı idüği müsbet olup mahalle-i mezbûrede vâki‘ bir tarafdan Zeyneb Hatun menzili ve bir tarafdan Câbî Mehmed Çelebi menzili ve bir tarafdan el-Hâc Mehmed Ağa menzili ve bir tarafdan tarîk-ı âm ile mahdûd fevkānî iki bâb oda ve <> câmekân odası ve hamam ve bir sofa ve bir kenîf ve bir matbah ve müşterek bi’r-i mâ ve zât-ı eşcâr-ı müsmire ve gayr-ı müsmire bahçeyi müştemil mülk menzili medîne-i mezbûre münâdîlerinden Mustafa nâm kimesne yediyle sûk-ı sultânîde ve mecma‘ü’n-nâs olan mahallerde üç ay mikdârı nidâ ve müzâyede olunup ragabât-ı nâs bi’l-külliye munkatı‘a oldukdan sonra mezbûr Osman Ağa üzerinde dört yüz on yedi guruşda karâr edüp ziyâde ile tâlib-i âhar zuhûr etmeyip ve meblağ-ı mezbûr menzil-i mahdûd-ı mezkûrun el-yevm semen-i misli idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer oldukdan sonra tarafeynden îcâb ve kabûlü hâvî ve şurût-ı müfsideden ârî bey‘-ı bâtt-ı sahîh-i şer‘î ile semen-i misli olan meblağ-ı mezbûr dört yüz on yedi guruşa mezbûr Osman Ağa’ya bi’l-verâse bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr dört yüz on yedi guruşu mezbûr Osman Ağa bana def‘ ü teslîm edüp ben dahi yedinden bi’t-tamam ve’l-kemâl ahz u kabz eyledim; ba‘de’l-yevm menzil-i mahdûd-ı mezkûr merkūm Osman Ağa’nın mülk-i müşterâsı ve hakk-ı sırfı olmuşdur; keyfe mâ yeşâ ve hasbemâ yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis-aşer min-Recebi’l-ferd sene 1147. Şuhûdü’l-hâl: İsmail Ağa b. İbrahim, es-Seyyid Hamza Çelebi b. Abdullah, Halil Ağa b. İbrahim, el-Hâc Hüseyin b. Abdurrahman, Ahmed Efendi b. Mustafa Efendi, Mustafa Efendi b. Hüseyin, es-Seyyid Hamza Efendi b. el-Kādî bi-Ürgüb muvakkaten, İbrahim Çelebi b. Ömer, Mehmed Çelebi b. Abdullah, Hüseyin Çelebi b. Mehmed.