Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 81 Hüküm no: 42 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çavuş b. Abdullah’ın küçük oğlu Mehmed Emin’e nafaka tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Baba Haydar Nakşibendî mahallesinde sâkin iken bundan akdem vefât eden Hasan Çavuş b. Abdullah’ın sulbî sagīr oğlu Mehmed Emin’in tesviye-i umûruna bâ-hüccet-i şer‘iye vasîyy-i muhtârı olan işbu râfi‘u’l-kitâb es-Seyyid Mehmed Çelebi b. es-Seyyid Mustafa meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasîsi olduğum sagīr-i mezbûrun nafaka ve kisve-bahâya eşedd-i ihtiyâcı olmağla sagīr-i mezbûrun bâ-berât-ı âlî-şân mutasarrıf olduğu ulûfesinden beher yevm dokuz akçe nafaka ve kisve-bahâ farz ve takdîr olunmak matlûbumdur dedikde vasîyy-i mezbûrun kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan [olmağın] hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri dahi sagīr-i mezbûra beher yevm dokuz akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisve-bahâsına harc ve sarfa ve lede’l-iktizâ istidâneye ve inde’z-zafer mâlına rücû‘a vasîyy-i mezbûra izin vermeğin mâ-vaka‘a bi’t-taleb ketb olundu. Fî-gurreti min-Muharremi’l-harâm sene 1147. Şuhûdü’l-hâl: Yahya Efendi b., Mustafa Efendi b. Hüseyin, Ahmed Efendi b. Mustafa Efendi, İbrahim Çelebi b. Abdurrahman, Mehmed Çelebi b. Abdullah.