Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 88 Hüküm no: 50 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçükköy ahalisinden İzgora bt. Nikola’nın, aynı köydeki bağ ve mahzenlerini hayatta iken kocası Yorgi’ye hibe ettiğine hükmolunarak kardeşlerinin, bağ ve mahzen hissesi talebiyle Yorgi’ye muarazada bulunmaktan menedildikleri Husûs-ı âti’l-beyânın mahâllinde istimâ‘ ve tahrîri içün savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refî‘a kazâsına tâbi‘ Küçük nâm karyede mütemekkine iken bundan akdem hâlike olan İzgora bt. Nikola nâm Nasrâniyenin hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde hâlike-i mersûmenin verâseti zevc-i metrûkü Yorgi v. Yani ile sadriye sagīre kızı Elencese’ye <> ve li-ebeveyn karındaşları Andon ve İstura? ve li-ebeveyn kız karındaşı Velencu’ya? münhasıra ve tashîh-i mes’eleleri yirmi sehimden i‘tibâr olunup sihâm-ı mezbûreden beş sehmi zevci mezbûr Yorgi’ye ve on sehmi sagīre-i mezbûre Elencese’ye ve ikişer sehmi karındaşları mezbûrândan her birine ve bir sehmi mezbûre Velencu’ya? isâbeti tahakkukundan sonra mezbûrân Andon ve İstupa? meclis-i ma‘kūd-ı mezkûrda işbu râfi‘u’s-sifr mezbûr Yorgi muvâcehesinde her biri üzerine da‘vâ ve takrîr-i kelâm edüp kız karındaşımı[z] hâlike-i mezbûrenin karye-i mezbûre hudû[d]u dâhilinde vâki‘ bir tarafdan Seksengöz veresesi bağı ve bir tarafdan Evlanoz bağı ve bir tarafdan ( ) bağı ve bir tarafdan tarîk-ı âm ile mahdûd <> mülk bağ ile yine karye-i mezbûrede vâki‘ üç tarafdan hâlike-i mezbûrenin âhar mülkü ve bir tarafdan tarîk ile mahdûd iki bâb tahtânî mahzen odasından tashîh-i mezkûr üzere her birimiz ikişer sehim hisse-i şer‘iyemizi taleb eylediğimi[z]de mezbûr Yorgi teslîmden imtinâ‘ eder; suâl olunsun dediklerinde gıbbe’s-suâl mezbûr Yorgi cevâbında bağ-ı mahdûd-ı mezkûr ile mahzen-i mezkûra vaz‘-ı yedini ikrâr lâkin zevcesi mezbûre İzgora bt. Nikola v. Yorgi hâl-i hayatında ve kemâl-i akıl [ve ]sıhhatinde târih-i kitâbdan üç sene mukaddem bağ-ı mahdûd-ı mezkûr ile mahzen-i mezkûru ba‘de’t-tahliyeti’ş-şer‘iye bana şuhûd-ı Nas[â]râ muvâcehelerinde hîbe ve temlîk ve teslîm ben da[hi] ber-vech-i muharrer meclis-i hîbede ittihâb ve temellük ve tesellüm ve kabûl edüp ol vechile benim mülk-i mevhûbum olmuşdur deyü def‘le mukābele edicek gıbbe’l-istintâk ve’l-inkâr mersûm Yorgi’den def‘-i meşrûhuna mutâbık beyyine taleb olundukda beyyinelerinde [beynlerinde] udûlden olup ricâl-i zimmiyândan karye-i mezbûre mütemekkinlerinden Baba Hesim? v. Manol ve Yorgi v. Toto nâm zimmîler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd, fi’l-hakīka şahsı rü’yetimiz ile ma‘lûmumuz olup karye-i mezbûre mütemekkinelerinden iken bundan akdem hâlike olan İzgora v. Nikola v. Yorgi nâm Nasrâniye hâl-i sıhhatinde sâlifü’z-zikr karye-i mezbûre hudûdu dâhilinde vâki‘ bir tarafdan Seksengöz veresesi bağı ve bir tarafdan Evlanoz bağı ve bir tarafdan ( ) ve bir tarafdan tarîk-ı âm ile mahdûd altı dönüm kürûmu mülk bağ ile yine karye-i mezbûrede vâki‘ üç tarafdan hâlike-i mezbûrenin âhar mülkü ve bir tarafdan tarîk-ı âm ile mahdûd iki bâb mahzen odasını ba‘de’t-tahliyeti’ş-şer‘iye târih-i kitâbdan [18b] üç sene mukaddem zevci işbu mersûm Yorgi’ye bizim muvâcehemizde hîbe ve temlîk ve teslîm ol dahi ber-vech-i <> muharrer meclis-i hîbede ittihâb ve tesellüm ve kabz ve kabûl eyledi; biz bu husûsa bu vech üzere şâhidleriz; şehâdet dahi ederiz deyü her biri edâ-i şehâdet-i şer‘iye etdikde ba‘de ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm <> mesfûrân Andon ve İstura’yı? bî-vech mu‘ârazadan men‘ ve tenbîh birle vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr Mehmed Çelebi ve Muhzır es-Seyyid Mehmed ile meclis-i şer‘a gelüp alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 7 Recebi’l-fer[d] sene 1147. Şuhûdü’l-hâl: Mustafa Efendi b. Hüseyin, es-Seyyid Ahmed Efendi b. es-Seyyid Abdurrahim, Ahmed Efendi b. Mustafa, Yahya Efendi b. Mustafa, Hüseyin Çelebi b. Mehmed, İbrahim Çelebi b. Ömer, es-Seyyid Mehmed Çelebi b. es-Seyyid Mustafa ve gayruhum.