Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 87 Hüküm no: 49 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın, ayrıntıları yazılı olan vasiyetini yerine getirmek üzere Ömer Çelebi b. Mustafa’yı vasî tayin ettiğine hükmolunduğu Husûs-ı âti’l-beyânın mahâllinde istimâ‘ ve tahrîri içün savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Ali Paşa-yı Cedîd mahallesinde sâkin iken bundan akdem vefât eden el-Hâc Mustafa b. Abdullah’ın hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun ber-vech-i âtî vasîyy-i muhtâr[ı] olduğunu iddi‘â eden işbu râfi‘u’l-kitâb Ömer Çelebi b. Mustafa meclis-i ma‘kūd-ı mezkûrda müteveffâ-yı mezbûrun li-ebeveyn kız karındaşı Hadîce Hatun bt. Abdullah tarafından vekîli [vekîl-i] müsecceli olup terekesine bi’l-vekâle vâzı‘u’l-yed olan Hadîce Hatun’un oğlu Salih Çelebi b. ( ) mahzarında üzerine da‘vâ ve takrîr-i kelâm edüp müteveffâ-yı mezbûr el-Hâc Mustafa b. Abdullah b. Abdurrahman hâl-i hayatında ve kemâl-i akıl [ve] sıhhatinde fevtinden bir gün mukaddem, ben bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz ve düyûn-ı müsbetem edâ olundukdan sonra terekemden üç bin akçe ıskāt-ı salâtım içün ifrâz ve devrolunup fukarâya tesâdduk oluna deyü vasiyet ve tenfîzine huzûr-ı Müslimînde beni vasîyy-i muhtâr nasb ü ta‘yîn <> edüp ben dahi ber-vech-i muharrer vesâyet-i mezbûreyi muvâcehesinde ba‘de’l-kabûl musırrân alâ-îsâihî fevt olmağla tenfîz-i vesâyâ murâd eylediğimde müvekkil-i mezbûr Salih Çelebi mâni‘ olur; suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden mahalle-i mezbûre sâkinlerinden Mehmed Efendi b. Mustafa ve el-Hâc Ali b. Mustafa nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd, fi’l-hakīka müteveffâ-yı [mezbûr] el-Hâc Mustafa b. Abdullah b. Abdurrahman hâl-i hayatında ve kemâl-i akıl [ve] sıhhatinde fevtinden bir gün mukaddem, ben bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz ve düyûn-ı müsbetem edâ olundukdan sonra terekemden üç bin akçe ıskāt-ı salâtım içün ifrâz ve devrolunup fukarâya tesâdduk oluna deyü mezbûr Ömer Çelebi’yi bizim huzûrumuzda vasîyy-i muhtâr nasb ü ta‘yîn edüp ol dahi ber-vech-i muharrer vesâyet-i mezbûreyi muvâcehesinde ba‘de’l-kabûl mezbûr el-Hâc Mustafa musırrân alâ-îsâihî vefât eyledi; biz bu husûsa bu vech üzere şâhidleriz; şehâdet dahi ederiz deyü her biri edâ-i şehâdet-i şer‘iye etdikde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûrun ber-vech-i muharrer vesâyetine <> ba‘de’l-hükm vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr el-Hâc Yusuf ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin [18a] mâ-vaka‘a bi’t-taleb ketb olundu. Fi’l-yevmi’s-sâmin-aşer min-Recebi’l-ferd li-seneti seb‘a ve erba‘în ve miete ve elf. Şuhûdü’l-hâl: Ali Ağa b., Ebûbekir Çelebi b. Mustafa, Ali Çelebi b. Mehmed, Ahmed Efendi b. Mustafa, es-Seyyid Ahmed Efendi b. Abdurrahim, Yahya Efendi b.