Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 91 Hüküm no: 52 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Petnahor köyü ahalisinden Saime Hatun bt. Mustafa’nın küçük kızları Ayşe ve Zeyneb’e nafaka tayini Havâss-ı Refî‘a kazâsına tâbi‘ Petnahor nâm karyede sâkin iken bundan akdem vefât eden Saime Hatun bt. Mustafa’nın sadriye sagīre kızları Âişe ve Zeyneb’in babaları ve tesviye-i emirlerine kıbel-i şer‘den mansûb vasîleri olan işbu râfi‘u’l-kitâb Nu‘man Efendi b. Abdülkadir meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasîleri olduğum sagīretân-ı mezbûretânın nafaka ve kisve-bahâya eşedd-i ihtiyâcı olmağla vâlideleri müteveffât-ı mezbûreden müntakıl mâllarından her birine nafaka ve kisve-bahâ farz ve takdîr olunmak matlûbumdur dedikde vasîyy-i mezbûrun kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīretân-ı mezbûretânın vâlideleri müteveffât-ı mezbûreden müntakıl mâllarından her birine yevmî ikişer akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīretân-ı mezbûretânın nafaka ve kisve-bahâlarına harc ve sarfa ve lede’l-iktizâ istidâneye ve inde’z-zafer mâllarına rücû‘a <> vasîyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’t-tâsi‘-aşer min-Recebi’l-ferd li-seneti seb‘a ve erba‘în ve miete ve elf. Şuhûdü’l-hâl: Osman Efendi b. Feyzullah, es-Seyyid Abdullah Çelebi b. Nu‘man, el-Hâc Hasan Efendi b. Abdüllatif, Mustafa Efendi b. Mehmed Hoca, Ahmed Beşe b. Mehmed, Ali Çelebi b. Berber.