Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 91 Hüküm no: 53 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın henüz sağ iken Fethi bt. Abdullah isimli cariyesini azat ettiğine hükmolunduğu Husûs-ı âti’l-beyânın mahâllinde istimâ‘ ve tahrîri içün savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Ali Paşa-yı Cedîd mahallesi sükkânından iken bundan akdem vefât eden el-Hâc Mustafa b. Abdullah’ın hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun verâseti zevce-i menkûha-i metrûkesi Hadîce Hatun bt. Mustafa ile li-ebeveyn kız karındaşı diğer Hadîce Hatun bt. Abdullah’a münhasıra olduğu şer‘an zâhir ve müte‘ayyin oldukdan sonra rıkk-ı sâbıkını mu‘terife olup kıbel-i şer‘den ber-vech-i âtî da‘vâya me’zûne olan işbu orta boylu, kara gözlü, kara kaşlı, Acemiyyetü’l-asl, Müslimetü’l-mille işbu bâ‘isetü’l-kitâb Fethi bt. Abdullah meclis-i ma‘kūd-ı mezkûrda müteveffâ-yı mezbûrun terekesine vâzı‘atu’l-yed olan zevcesi mezbûre Hadîce Hatun ile kız karındaşı mezbûre diğer Hadîce Hatun’un oğlu ve tarafından husûs-ı âti’l-beyânda vekîl-i müsecceli olan Salih Çelebi b. ( ) ve müteveffâ-yı mezbûrun bâ-hüccet-i şer‘iye vasîyy-i muhtârı olan Ömer Çelebi b. Mustafa mahzarında üzerlerine da‘vâ ve takrîr-i kelâm edüp ben müteveffâ-yı mezbûr el-Hâc Mustafa b. Abdullah b. Abdurrahman’ın câriye-i memlûkesi olup mülkünde iken hâl-i hayatında ve kemâl-i akıl [ve] sıhhatinde fevtinden on gün mukaddem <> beni mâlından âzad ve mülkünden ihrâc edüp sâir harâir-i asliyât gibi hürre olmuş iken mezbûre Hadîce Hatun ve vekîl-i mezbûr Salih Çelebi ve vasîyy-i mezbûr Ömer Çelebi terekeden olmak üzere bana vâzı‘u’l-yed [vaz‘-ı yed] ederler; suâl olunup kasr-ı yedlerine [19b] tenbîh ve sebîlim tahliye olunması matlûbumdur dedikde gıbbe’s-suâl ve’l-inkâr müdde‘iye-i mevsûfe-i mezbûreden müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden mahalle-i mezbûre sâkinlerinden el-Hâc Yusuf b. Abdullah ve Mehmed Ağa b. Osman nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd, fi’l-hakīka müteveffâ-yı mezbûr el-Hâc Mustafa b. Abdullah b. Abdurrahman hâl-i hayatında ve kemâl-i akıl [ve] sıhhatinde câriye-i memlûkesi olan işbu orta boylu, kara gözlü, kara kaşlı, Acemiyyetü’l-asl, Müslimetü’l-mille Fethi bt. Abdullah’ı fevtinden on gün mukaddem bizi[m] huzûrumuzda mâlından âzad ve mülkünden ihrâc edüp sâir harâir-i asliyât zümresine ilhâk ve idrâc etmekle mevsûfe-i mezbûre Fethi sâir harâir-i asliyât gibi hürre olmuşdur; biz bu husûsa bu vech üzere şâhidleriz; şehâdet dahi ederiz deyü her biri edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mevsûfe-i mezbûrenin ber-vech-i muharrer ıtkına ba‘de’l-hükm vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr el-Hâc Yusuf ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 2 Şa‘bâni’l-mu‘azzam sene 1147. Şuhûdü’l-hâl: İmâm Mehmed Efendi b. Mustafa, Ahmed Ağa b. Mehmed, Ebûbekir Çelebi b. <>, Yahya Efendi b. Mustafa, Ahmed Efendi b. Mustafa, es-Seyyid Mehmed b. es-Seyyid Mustafa, İbrahim Çelebi b., Abdullah Çelebi b. İsmail, el-Hâc Mustafa b. Abdullah, İbrahim Çelebi b. Abdurrahman, Hüseyin Çelebi b. Mehmed ve gayruhum mine’l-huzzâr.