Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 94 Hüküm no: 55 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın, üvey kızı Ümmügülsüm Hatun bt. Şaban’a vasîlik döneminden kalan borcunun terekesinden ödenmesi Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de el-Hâc Hüsrev mahallesinde sâkine Ümmügülsüm Hatun bt. Şa‘bân’ın zevci ve tarafından taleb ve da‘vâ ve ahz u kabza vekîl olduğu zât-ı mezbûreyi ma‘rifet-i şer‘iye ile ârifân olan Ebûbekir Çelebi b. Mustafa ve Mustafa Çelebi b. Ömer şehâdetleriyle sâbit olan işbu râfi‘u’l-kitâb el-Hâc Mustafa b. el-Hâc Ali meclis-i şer‘-i şerîf-i enverde medîne-i mezbûrede Ali Paşa-yı Cedîd mahallesinde sâkin iken bundan akdem vefât eden el-Hâc Mustafa b. Abdullah’ın zevce-i menkûha-i metrûkesi Hadîce Hatun bt. Mustafa <> ile müteveffâ-yı mezbûrun düyûn-ı müsbetesini edâya bâ-hüccet-i şer‘iye vasîyy-i muhtârı olan Ömer Çelebi b. Mustafa mahzarında üzerlerine da‘vâ ve takrîr-i kelâm edüp zevcem müvekkile-i mezbûrenin hâl-i sıgārında babası müteveffâ el-Hâc Şa‘ban’dan müntakıl eşyâ ve nukūd ve sâir terekesini üvey babası müteveffâ el-Hâc Mustafa kabz ve eşyâyı bey‘ ve semenini ve nukūd-ı mezbûreyi istirbâh ve emriyle masârifine ba‘zısın sarf edüp ba‘de küllî hesâbin mal-ı mevrûsundan zimmetinde üç yüz seksen iki guruş deyn olmak üzere bâkī kalıp hatta müteveffâ-yı mezbûr bin yüz kırk dört senesinde meblağ-ı mezbûr zimmetinde müvekkilem mezbûreye deyni olduğunu huzûr-ı Müslimînde ikrâr ve işhâd edüp kable’l-edâ fevt olmağla terekesinden bi’l-vekâle taleb ederim, suâl olunsun dedikde gıbbe’s-suâl ve’l-inkâr vekîl-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden sâlifü’z-zikr Ali Paşa-yı Cedîd mahallesinde sâkin el-Hâc Yusuf b. Abdullah ve Ebûbekir Çelebi b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd, fi’l-hakīka müteveffâ-yı mezbûr el-Hâc Mustafa b. Abdullah b. Abdurrahman işbu rebîbesi Ümmügülsüm Hatun’un hâl-i sıgārında babası müteveffâ el-Hâc Şa‘ban’dan müntakıl eşyâ ve nukūd ve sâir terekesini üvey babası müteveffâ el-Hâc Mustafa kabz ve eşyâyı bey‘ ve semenini ve nukūd-ı mezbûreyi istirbâh ve emriyle ba‘zısın masârifine sarf edüp ba‘de küllî hesâbin mal-ı mevrûsundan zimmetinde üç yüz seksen iki guruş deyn olmak üzere bâkī kalıp hatta müteveffâ-yı mezbûr bin yüz kırk dört senesinde cihet-i mezkûreden meblağ-ı mezbûr zimmetinde rebîbesi müvekkile-i mezbûre Ümmügülsüm Hatun’a deyni olduğunu huzûrumuzda ikrâr ve bizi işhâd eyledi; biz bu husûsa bu vech üzere şâhidleriz; şehâdet dahi ederiz deyü [20b] her biri edâ-i şehâdet-i şer‘iye eyledikde ba‘de’t-ta‘dîl ve’t-tezkiye şehâdetleri makbûle oldukdan sonra tahlîf-i şer‘î içün zâtı ta‘rîf-i şer‘î ile mu‘arrefe olan müvekkile-i mezbûre Ümmügülsüm Hatun meclis-i şer‘a ihzâr ve ba‘de’t-tahlîfi’ş-şer‘î mûcebiyle ba‘de’l-hükm meblağ-ı mezbûr üç yüz seksen iki guruşu müteveffâ-yı mezbûrun terekesinden edâya vasîyy-i mezbûr Ömer Çelebi ile zevcesi mezbûre Hadîce Hatun’a tenbîh birle mâ-vaka‘a bi’t-taleb ketb olundu. Fi’l-yevmi’r-râbi‘ ve’l-işrîn min-Şa‘bâni’l-mu‘azzam sene 1147. Şuhûdü’l-hâl: Yahya Efendi b. Mustafa, es-Seyyid Ahmed Efendi Kādî-i Ürgüb muvakkaten, Ahmed Efendi b. Mustafa, Mustafa Efendi b. Hüseyin, Mehmed Efendi Kadızâde, Hüseyin Çelebi b. Mehmed, İbrahim Çelebi b. Ömer, Abdullah Çelebi b. İsmail, el-Hâc Mustafa b. Abdullah, el-Hâc Yusuf Çukadâr.