Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 93 Hüküm no: 54 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi b. Mehmed’den miras kalan evin müştemilatının, bilirkişiler marifetiyle varisler arasında hisselerine göre ifrazı Husûs-ı âti’l-beyânın mahâllinde ketb ü tahrîri içün savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Davudağa mahallesinde sâkin iken bundan akdem vefât eden Ali Çelebi b. Mehmed’in hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun verâseti zevce-i menkûha-i metrûkesi Zeyneb Hatun bt. Nasrullah ile sulbî sagīr oğlu Mustafa’ya ve sulbiye kebîre kızı Âişe ve Emetullah ve Şerîfe Rukiye’ye münhasıra ve tashîh-i mes’eleleri kırk sehimden i‘tibâr olunup sihâm-ı mezbûreden beş sehmi zevcesi mezbûreye ve on dört sehmi sagīre-i mezbûreye ve yedişer sehmi kızları mezbûrûndan her birlerine isâbeti tahakkukundan sonra zâtları ta‘rîf-i şer‘î ile mu‘arrefe olan mezbûrât Âişe ve Emetullah ve Şerîfe Rukiye meclis-i ma‘kūd-ı mezkûrda müteveffâ-yı mezbûrun zevcesi ve sagīr-i mezbûrun vâlidesi ve tesviye-i umûruna mansûbe vasîsi olan işbu râfi‘atü’l-kitâb mezbûre Zeyneb Hatun mahzarında her biri ikrâr ve takrîr-i kelâm edüp babamız müteveffâ-yı mezbûrun ile’l-vefât yedinde mülk ve hakkı idüği müsbet olup mahalle-i mezbûrede vâki‘ bir tarafdan ba‘zan Keçeci ve ba‘zan Mehmed Çelebi menzili ve bir tarafdan Müfettiş-i sâbık menzili ve bir tarafdan ba‘zan Attar Mehmed Çelebi ve ba‘zan Kurşuncu Ahmed Çelebi menzili ve bir tarafdan tarîk-ı âm ile mahdûd ve üç bâb fevkānî oda ve iki dehliz ve bir bâb tahtânî oda ve bir köşk ve iki kenîf ve iki [20a] ve iki nerdübân ve iki su kuyusu ve zât-ı eşcâr-ı müsmire ve gayr-ı müsmire bahçeyi müştemil menzilden her birlerin hisseleri ifrâz olunmak murâdımızdır dediklerinde Hâssa mi‘mârlarından Ali Halîfe b. Ahmed ve Süleyman Halîfe b. Abdi ve zeyl-i kitâbda mektûbü’l-esâmî olup ebniye ve sükûfa [sukūfa] ıttılâ‘ı olan Müslimîn ile menzil-i mahdûd-ı mezkûrun ba‘de’n-nazar ve’l-keşf ve’l-mesâha menzil-i mahdûd-ı mezkûrdan müfrez bir tarafdan ba‘zan Keçeci ve ba‘zan Mehmed Çelebi menzili ve bir tarafdan Müfettiş-i sâbık menzili ve bir tarafdan mezbûr menzilden müfrez mahâl ve bir tarafdan tarîk-ı âm ile mahdûd iki bâb fevkānî oda ve bir matbah ve mağsel ve bir mikdâr dehliz ve tahtında bir bâb sagīr oda ve kenîf ve bir su kuyusu ve havlu ve sokak kapısını müştemil menzil zevcesi mezbûre Zeyneb Hatun ile sagīr-i mezbûrun hisseleri içün kendiler rızâlarıyla ta‘yîn ve tahsîs ve alâmet-i fâsıla vaz‘ olunup ba‘de’l-yevm menzil-i mahdûd-ı müfrez-i mezkûreye müte‘allika âmme-i de‘âvîden mezbûre Zeyneb Hatun ile sagīr-i mezbûrun zimmetlerini ibrâ ve ıskāt eyledik dediklerinde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr el-Hâc Mehmed ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 22 min-Receb sene 1147. Şuhûdü’l-hâl: es-Seyyid Mehmed b. Davud, Mustafa Çelebi b. Mehmed, Nasrullah b. Ahmed, Ahmed Ağa b. Mehmed, Ali Beşe b. Mehmed, es-Seyyid Mehmed b. es-Seyyid Mustafa, Hüseyin Çelebi b. Mehmed ve gayruhum mine’l-huzzâr.