Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 96 Hüküm no: 57 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Litros köyü ahalisinden Doksa bt. Bato’nun Beytülmal tarafından el konulan terekesinin, varislerine verilmesine hükmolunduğu Havâss-ı Refî‘a kazâsına tâbi‘ Litros nâm karyede mütemekkine iken bundan akdem hâlike olan Doksa bt. Bato’nun zî-rahm cihetinden vârisi olduğunu iddi‘â eden işbu râfi‘u’s-sifr Kokoza bt. Kosta meclis-i şer‘-i <<şer‘-i>> şerîf-i enverde karye-i mezbûrenin Beytü’l-mâlini kabza me’mûr olup tereke-i hâlike-i mersûmeye bi’l-emâne vâzı‘u’l-yed olan el-Hâc Mustafa b. Mehmed mahzarında üzerine da‘vâ ve takrîr-i kelâm edüp hâlik[e]-i mersûme Doksa’nın anası Balaşe ile benim anam Kasandra li-ebeveyn kız karındaşlar olup anaları ismi Badine ve babaları ismi Yorgi ve [de]deleri ismi Dimitri ve maskat-ı re’sleri [21a] karye-i mezbûrede olup verâseti benim ile zevci Yani nâm zimmîye münhasıra ve tereke-i hâlike-i merkūmeye bizlerden gayri müstahıkk-ı âhar yoğiken emîn-i mezbûr bi-gayr-ı hakkın vaz‘-ı yed eder; suâl olunup kasr-ı <> yedine tenbîh olunmak matlûbumdur dedikde gıbbe’s-suâl emîn-i mezbûr cevâbında tereke-i hâlike-i mersûmeye bi’l-emâne vaz‘-ı yedini ikrâr lâkin müdde‘iye-i mersûmenin <> ber-vech-i muharrer vâris olduğunu inkâr edicek müdde‘iye-i merkūmeden müdde‘âsını mübeyyine beyyine taleb olundukda udûl-i Nasârâdan karye-i mezbûre mütemekkinlerinden Nikola v. Yani ve Yani v. Norsen? ve Baba Yani v. Hristodi nâm zimmîler li-ecli’ş-şehâde meclis-i şer‘a hâzırûn olup isre’l-istişhâd, fi’l-hakīka işbu müdde‘iye-i mersûme Koko[za]’nın anası Kasandra ile hâlike-i mersûme Doksa’nın anası Balaşe li-ebeveyn kız karındaşlar olup anaları ismi Badine ve ba[ba]ları ismi Yorgi ve dedeleri ismi Dimitri ve maskat-ı re’sleri karye-i mezbûreden olup hâlike-i mersûme Doksa’nın zevci Yani ile müdde‘iye-i mersûme Kokoza’dan gayri vârisi ve terekesine müstahıkk-ı âhar olduğu ma‘lûmumuz değildir; biz bu husûsa bu vech üzere şâhidleriz; şehâdet dahi ederiz deyü her biri edâ-i şehâdet-i şer‘iye etdikden sonra gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fî 25 min-Şa‘bân sene 1147. Şuhûdü’l-hâl: Mustafa Efendi b. Hüseyin, Ahmed Efendi b. Mustafa Efendi, Yahya Efendi b. Mustafa, es-Seyyid Mehmed b. es-Seyyid Mustafa, Hüseyin Çelebi b. Mehmed, İbrahim Çelebi b. Ömer, Abdullah Çelebi b., Hüseyin Çelebi b. Mehmed, el-Hâc Yusuf b. Çukadâr, el-Hâc Mustafa [b.] Abdullah Çelebi.