Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 97 Hüküm no: 58 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa b. Mehmed’in reşit olan oğlu İsmail’in, küçüklüğünde vasîsi olan Mustafa b. Mehmed’in zimmetini vasîlik dönemine ait hesaplardan ibra ettiği Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Takyecibaşı mahallesi ahâlîsinden iken bundan akdem vefât eden el-Hâc Halil Ağa b. Mehmed’in sulbî oğlu İsmail nâm bâliği[n] bulûğuna rüşdü munzam olduğunu mahalle-i mezbûre sâkinlerinden Mehmed Efendi b. Ömer ve Süleyman Efendi b. Mehmed ve Ömer Ağa b. Mehmed ve es-Seyyid Ahmed b. Hüseyin nâm kimesneler alâ-tarîkı’ş-şehâde ba‘de’l-ihbâr meclis-i şer‘-i şerîf-i enverde işbu râfi‘u’l-kitâb el-Hâc Mustafa b. Mehmed mahzarında ikrâr ve takrîr-i kelâm edüp benim hâl-i sıgārımda mezbûr el-Hâc Mustafa vasîyy-i muhtârım olup babam müteveffâ-yı mezbûrdan müntakıl mal-ı mevrûsumdan hisse-i şer‘iyemi ahz u kabz edüp târih-i kitâba gelince nafaka ve kisvem ve sâir masârif-i lâzımem içün harc ve sarf edüp el-hâletü hâzihî vasîyy-i mezbûr el-Hâc Mustafa ile hesâbımız görüldükde ancak zimmetinde ber-mûceb-i defter-i kassâm ve muhâsebe iki [yük] sekiz yüz elli dört akçe zuhûr etmekle meblağ-ı mezbûru merkūm el-Hâc Mustafa bana def‘ ü teslîm ben dahi ber-vech-i muharrer yedinden bi’t-tamam ve’l-kemâl ahz u kabz edüp meblağ-ı mezbûr iki yük sekiz yüz elli dört akçeden merkūm el-Hâc Mustafa yedinde ve zimmetinde bir akçe ve bir habbe bâkī kalmayıp ba‘de’l-yevm babam müteveffâ-yı mezbûrun terekesinden mezbûr el-Hâc Mustafa’nın makbûz ve masrûfuna müte‘allika âmme-i de‘âvî ve mutâlebât ve eymân [ve] muhâsamâtdan [21b] mezbûr el-Hâc Mustafa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim, vechen mine’l-vücûh ve sebeben mine’l-esbâ[b] [ve] nev‘an mine’l-envâ‘ da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî-aşer min-Şa‘bân min-Recebi’l-ferd sene 1147. Şuhûdü’l-hâl: Hasan Ağa b. Ali, el-Hâc Hüseyin b. Abdullah, el-Hâc Mustafa b. İbrahim, Halil b. Mustafa, Süleyman Beşe b. Mustafa, Ali Çelebi b. Mustafa.