Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 98 Hüküm no: 59 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasım b. Mehmed’in varislerinden oğlu İbrahim’in, Topçular köyünde miras hissesini Sinan Beşe b. Ahmed’e sattığı Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refî‘a kazâsına tâbi‘ Topçular nâm karyede sâkin iken bundan akdem vefât eden el-Hâc Kasım b. Mehmed’in hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun verâseti zevce-i menkûha-i metrûkesi Hadîce bt. Ali ile sulbî kebîr oğlu İbrahim ve sulbî sagīr oğlu Musa’ya münhasıra ve tashîh-i mes’elesi on altı sehimden i‘tibâr olunup sihâm-ı mezbûreden iki sehmi zevcesi mezbûre ve yedişer sehmi oğulları mezbûrândan her birine isâbeti tahakkukundan sonra mezbûr İbrahim Beşe meclis-i ma‘kūd-ı mezkûrda işbu râfi‘u’l-kitâb Sinan Beşe b. Ahmed mahzarında ikrâr ve takrîr-i kelâm edüp babam müteveffâ-yı mezbûrun ile’l-vefât taht-ı tasarrufunda olan Cico Bostanı demekle ma‘rûf bostanda mağrûs eşcâr-ı müsmire ve sebzevât ve sâir âlâtdan bana isâbet eden yedi sehim hissemi mezbûr Sinan Beşe’ye seksen guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr seksen guruşu mezbûr Sinan Beşe yedinden bi’t-tamam ve’l-kemâl alıp kabz eyledim, ba‘de’l-yevm zikri mürûr eden bostanın derûnunda mağrûs <> eşcâr-ı müsmire ve sebzevât ve sâir âlâtdan yedi sehim hissem mezbûr Sinan Beşe’nin mülk-i müşterâsı <> olup benim kat‘a alâka ve medhalim kalmadı dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr el-Hâc Mehmed ve Muhzır es-Seyyid Mehmed meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 2 min-Ramazan sene 1147. Şuhûdü’l-hâl: el-Hâc İbrahim Ağa b. Mehmed, el-Hâc İbrahim b. Ömer, el-Hâc Ahmed b. Ömer, el-Hâc Ahmed Efendi [b.] el-Hâc Mehmed, Mustafa Beşe b. Hüseyin, Halil Beşe b. Mehmed, Osman Beşe b. Mustafa, Mehmed Çelebi b. İbrahim.