Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 102 Hüküm no: 62 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Makrihora köyü ahalisinden Osman Beşe b. Ali’nin küçük kızları Ümmügülsüm ve Rukiye ile doğacak çocuğuna vasî ve kayyım tayini Havâss-ı Refî‘a [kazâsına] tâbi‘ Makrihora nâm karyede sâkin iken bundan akdem vefât eden Osman Beşe b. Ali’nin sulbiye sagīre kızları Ümmügülsüm ve Rukiye’nin tesviye-i emirlerine ve zevcesi Emetullah Hatun bt. Mehmed’in batnı[n]da müstebîn hamlin hisse-i mevkūfesini ahz u kabz [ve] zabt u hıfza kıbel-i şer‘den bir vasî ve kayyım nasbı lâzım ve mühim olmağın emânet ile ma‘rûfe ve diyânet ile mevsûfe, her vechile vesâyet uhdesinden gelmeğe kādir[e] idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīretân-ı mezbûretânın vâlideleri işbu râfi‘atü’l-kitâb mezbûre Emetullah Hatun’u hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīretân-ı mezbûretânın tesviye-i emirlerine ve haml-i merkūmun hisse-i mevkūfesini ahz u kabz [ve] zabt u hıfza vasî ve kayyım nasb <> ve ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımelerini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 8 min-Rebî‘ülevvel sene 1147. Şuhûdü’l-hâl: Ahmed Beşe b. Ali, İsmail Ağa b. Mehmed Efendi, es-Seyyid Hasan b. Hüseyin, Osman Beşe b. Abdullah, es-Seyyid Kasım b. Hüseyin, Ahmed Beşe b. Hüseyin.