Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 105 Hüküm no: 64 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe Hatun bt. Abdülbaki Efendi’nin küçük çocukları Abdülbaki, Şerife Fatma ve Şerife Hatice’ye vasî tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Çavuş Kasım mahallesinde sâkine iken bundan akdem vefât eden Şerîfe Âişe Hatun bt. es-Seyyid Abdülbaki Efendi’nin sadrî sagīr oğlu es-Seyyid Abdülbaki ile sadriye sagīre kızları Şerîfe Fâtıma ve Şerîfe Hadice’nin tesviye-i emirlerine kıbel-i şer‘den bir vasî nasbı lâzım ve mühim olmağın sıgār-ı mezbûrûnun babaları olup mahmûdü’l-hâl idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan bâ‘isü’l-kitâb el-Hâc İbrahim Efendi b. Ahmed[‘i] hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sıgār-ı mezbûrûnun tesviye-i emirlerine vasî nasb ü ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımelerin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 19 min-Şevvali’l-mükerrem sene 1147. Şuhûdü’l-hâl: Ahmed Efendi b. Derviş Ahmed, İsmail Efendi b. el-Hâc Osman, el-Hâc Mehmed Ağa b. Ebûbekir, Ahmed Efendi b. Halil, Yusuf Efendi b. Ali, Hasan Efendi b. Ahmed, Ahmed Çelebi b. Süleyman, el-Hâc İbrahim b. Mustafa, es-Seyyid Mehmed b. es-Seyyid Mustafa, el-Hâc Yusuf b. Abdullah.