Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 105 Hüküm no: 65 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe Hatun bt. Abdülbaki Efendi’nin küçük çocukları Abdülbaki, Şerife Fatma ve Hatice’ye nafaka tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Çavuş Kasım mahallesinde sâkine iken bundan akdem vefât eden Şerîfe Âişe Hatun bt. es-Seyyid Abdülbaki’nin sadrî sagīr oğlu es-Seyyid Abdülbaki ile sadriye sagīre kızları Şerîfe Fâtıma ve Hadice’nin babaları ve tesviye-i emirlerine bâ-hüccet-i şer‘iye vasîleri olan bâ‘isü’l-kitâb el-Hâc İbrahim Efendi b. Ahmed meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasîleri olduğum sıgār-ı mezbûrûnun nafaka ve kisve-bahâya eşedd-i ihtiyâcı olmağla vâlideleri müteveffât-ı mezbûreden müntakıl mâllarından her birine kadr-ı ma‘rûf nafaka ve kisve-bahâ farz ve takdîr <> olunmak matlûbumdur dedikde vasîyy-i mezbûrun kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sıgār-ı mezbûrûnun vâlideleri müteveffât-ı [24a] mezbûreden müntakıl mâllarından her birine yevmî sekizer akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sıgār-ı mezbûrûnun nafaka ve kisve-bahâlarına harc ve sarfa ve lede’l-iktizâ istidâneye ve inde’z-zafer mâllarına rücû‘a vasîyy-i mezbûr el-Hâc İbrahim Efendi’ye izin vermeğin mâ-vaka‘a bi’t-taleb ketb olundu. Fî 19 min-Şevvali’l-mükerrem sene 1147. Şuhûdü’l-hâl: Eş-şâhidûnü’s-sâbıkūn.