Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 108 Hüküm no: 68 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çorbacı Mustafa Ağa b. Mehmed’in küçük oğlu Hüseyin’in, hıyaneti zuhur eden vasîsinin azli ve yerine yeni vasî tayini Mahmiye-i İstanbul’da Firuzağa mahallesinde sâkin iken bundan akdem vefât eden Çorbacı el-Hâc Mustafa Ağa b. Mehmed’in sulbî sagīr oğlu Hüseyin’in vasîyy-i mansûbu olan Mehmed Odabaşı b. Hasan’ın hıyâneti zuhûr edüp şer‘an azli lâzım gelmeğin emânet ile ma‘rûf ve diyânet ile mevsûf, her vechile vesâyet uhdesinden gelmeğe kādire idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīr-i mezbûrun li-ebin kız karındaşı olup medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Ulucababa mahallesinde sâkine Âişe Hatun’u hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri merkūm Mehmed Odabaşı’nın yerine vasî nasb ve ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Şevvali’l-mükerrem sene 1147. Şuhûdü’l-hâl: Mustafa Efendi b. Hüseyin, es-Seyyid Mehmed b. es-Seyyid Mustafa, Ahmed Efendi b. Mustafa, Abdullah Ağa b. Mehmed, Yusuf Çelebi b. Abdullah.