Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 107 Hüküm no: 67 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Mustafa’nın, Yemişçi Mehmed b. Receb’e borcu bulunduğuna hükmolunduğu Mahmiye-i İstanbul’da Yemiş İskelesi’nde sâkin Yemişci tâifesinden işbu râfi‘u’l-kitâb el-Hâc Mehmed b. Receb meclis-i şer‘-i şerîf-i enverde medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Ulucababa mahallesinde sâkin iken bundan akdem vefât eden Mehmed Çelebi b. Mustafa’nın verâseti zevce-i menkûha-i metrûkesi Âişe Hatun bt. ( ) ile sulbî sagīr oğlu Ali’ye ve vâlidesi Fâtıma Hatun bt. Mustafa’ya münhasıra olduğu şer‘an zâhir ve müte‘ayyin oldukdan sonra sagīr-i mezbûr Ali’nin vâlidesi ve tesviye-i umûruna bâ-hüccet-i şer‘iye vasîsi olan mezbûre Âişe Hatun tarafından vekîl olduğu Osman Çelebi b. el-Hâc Mehmed ve Mehmed Odabaşı b. Hasan şehâdetleriyle şer‘an sâbit olan müteveffâ-yı mezbûrun vâlidesi mezbûre Fâtıma Hatun bt. Mustafa mahzarında üzerine da‘vâ ve takrîr-i kelâm edüp müteveffâ-yı mezbûr Mehmed Çelebi b. Mustafa b. Abdullah’ın zimmetinde vezin ve kıymet ve kıyyesi beynimizde ma‘lûm kuruyemiş bahâsından ba‘de külli’l-hesâb yüz on guruş hakkım olup hatta müteveffâ-yı mezbûr hâl-i hayatında ve kemâl-i akıl [ve] sıhhatinde fevtinden on beş gün mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edüp kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden mahmiye-i İstanbul’da Müftü Hamamı mahallesinde sâkin el-Hâc Hasan b. Mustafa ve kasaba-i Tophâne’de Sultân Bâyezid mahallesinde sâkin Mehmed Çelebi b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd, fi’l-hakīka müteveffâ-yı mezbûr Mehmed Çelebi b. Mustafa b. Abdullah’ın işbu müdde‘î-i mezbûr el-Hâc Mehmed Çelebi’ye zimmetinde vezin ve kıymet ve vukıyyesi beynlerinde ma‘lûm kuruyemiş bahâsından ba‘de külli’l-hesâb yüz on guruş deyni olup hatta müteveffâ-yı mezbûr hâl-i hayatında ve kemâl-i akıl [ve] sıhhatinde fevtinden on beş gün mukaddem meblağ-ı mezbûr zimmetinde işbu müdde‘î-i mezbûr el-Hâc Mehmed’e vâcibü’l-edâ deyni olduğunu huzûr-ı Müslimînde ikrâr ve işhâd eyledi; biz bu husûsa bu vech üzere şâhidleriz; şehâdet dahi ederiz deyü her biri edâ-i şehâdet-i şer‘iye etdikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fî 14 min-Şevval sene 1147. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, es-Seyyid Mehmed Çelebi b. es-Seyyid Mustafa, Yahya Efendi b. Mustafa, Hüseyin Çelebi b. Mehmed, İbrahim <> b. Ömer ve gayr.