Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 111 Hüküm no: 70 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun bt. İbrahim’in varisleri Ömer Çelebi ve Ebubekir Çelebi’nin, vasî Mustafa b. Hüseyin’in zimmetini miras hususunda ibra ettikleri Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. el-merhûm irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Baba Haydar Nakşibendî mahallesinde sâkin iken bundan akdem vefât eden Fâtıma Hatun bt. el-Hâc İbrahim’in hayatında sâkine olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffât-ı mezbûrenin sülüs-i vasiyyeti olmağla tashîh-i mes’eleleri üç sehimden i‘tibâr olunup sihâm-ı mezbûreden bir sehmi sülüs-i mezbûreye ve birer sehmi mukarrun-leh bi’n-neseb cihetinden Ömer Çelebi ve Ebûbekir Çelebi ibney-i İbrahim’e isâbeti tahakkukundan sonra mezbûrân Ömer Çelebi ve Ebûbekir Çelebi meclis-i ma‘kūd-ı mezkûrda müteveffât-ı mezbûrenin sülüsünü tenfîze bâ-hüccet-i şer‘iye vasîyy-i muhtârı olup terekesine vâzı‘u’l-yed olan işbu râfi‘u’l-kitâb el-Hâc Mustafa b. Hüseyin mahzarında her biri ikrâr ve takrîr-i kelâm edüp mûrisemiz müteveffât-ı mezbûrenin terekesi tahrîr ve ba‘de ihrâci’l-masârifi ve’d-düyûn ber-mûceb-i defter-i kassâm-ı askerî tashîh-i mezbûr üzere hisselerimize isâbet eden kırk beş bin beş yüz yetmiş beş akçe[yi] vasîyy-i merkūm el-Hâc Mustafa terekeden olmak üzere [bize] def‘ ve teslîm biz dahi ber-vech-i muharrer meblağ-ı mezbûru her birimiz bi-kad[ri]’l-hısas vasîyy-i merkūm el-Hâc Mustafa yedinden bi’t-tamam ve’l-kemâl ahz u kabz edüp meblağ-ı mezbûr kırk beş bin beş yüz yetmiş bir akçeden vasîyy-i merkūm yedinde bir akçe ve bir habbe hakkımız bâkī kalmayıp ba‘de’l-yevm mûrisemiz müteveffât-ı mezbûrenin terekesinden hâric-i ez-defter ve dâhil-i defter kalîl ve kesîr celîl ve hakīr ma‘lûma ve mechûle müte‘allika âmme-i miras da‘vâsından vasîyy-i merkūm el-Hâc Mustafa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dediklerinde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr el-Hâc Yusuf b. Abdullah ve [Muhzır] es-Seyyid Mehmed b. es-Seyyid Mustafa ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 17 min-Ramazani’l-mübârek sene 1147. Şuhûdü’l-hâl: Ali Beşe b. Mustafa, Mehmed Çelebi b. Mustafa, Memiş Beşe b. Mustafa, Ahmed Çelebi b. Hüseyin, Ahmed Efendi b. Mustafa, es-Seyyid Ahmed b. es-Seyyid.