Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 112 Hüküm no: 71 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terkos nahiyesinin Tursun köyü ahalisinden Hasan Beşe b. İbrahim’in küçük kızı Hatice’ye nafaka tayini Havâss-ı Refî‘a kazâsı muzâfâtından Terkos nâhiyesine tâbi‘ Tursun nâm karyede sâkin iken bundan akdem vefât eden Hasan Beşe b. İbrahim’in sulbiye sagīre kızı Hadice’nin li-ebeveyn karındaşı ve velîsi olan işbu râfi‘u’l-kitâb Ahmed Beşe meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp velîsi olduğum sagīre-i mezbûre mücerred terbiyemde olmağla nafaka ve kisve-bahâya eşedd-i ihtiyâcı olup babası müteveffâ-yı mezbûrdan müntakıl mâlından kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde mezbûr Ahmed Beşe’nin kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâ[b] -tûbâ lehû ve hüsnü-meâb- efendi hazretleri mezbûr Ahmed Beşe talebiyle sagīre-i mezbûre Hadice’ye babası müteveffâ-yı mezbûrdan müntakıl mâlından beher yevm beşer akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīre-i mezbûre Hadice’nin nafaka ve kisve-bahâsına harc ve sarfa ve lede’l-iktizâ istidâneye ve inde’z-zafer mâlına rücû‘a mezbûr Ahmed Beşe’ye izin vermeğin mâ-vaka‘a bi’t-taleb ketb olundu. Fî 26 min-Şevvali’l-mükerrem sene 1147. Şuhûdü’l-hâl: Osman Efendi b. Abdullah, Mehmed Ağa b., Ahmed Ağa b. Mehmed, Mehmed Ağa b. Abdullah, Yusuf Beşe b. Abdullah, Molla Ahmed b. Mustafa.