Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 113 Hüküm no: 72 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Mustafa’nın, Yemişçi İbrahim b. Ali’ye borcu bulunduğuna hükmolunduğu Yemişci <> tâifesinden olup işbu râfi‘u’l-kitâb es-Seyyid İbrahim b. el-Hâc Ali meclis-i şer‘-i şerîf-i enverde medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Ulucababa mahallesinde sâkin iken bundan akdem vefât eden Mehmed Çelebi b. Mustafa’nın verâseti zevce-i menkûha-i metrûkesi Âişe Hatun bt. ( ) ile sulbî sagīr oğlu <> Ali ile vâlidesi Fâtıma Hatun bt. Mustafa’ya münhasıra olduğu şer‘an zâhir ve müte‘ayyin oldukdan sonra sagīr-i mezbûr Ali’nin vâlidesi ve tesviye-i umûruna bâ-hüccet-i şer‘iye vasîsi olan mezbûre Âişe Hatun tarafından vekîl olduğu Osman Çelebi b. ( ) ve Mehmed Odabaşı b. Hasan şehâdetleriyle şer‘an sâbit olan müteveffâ-yı mezbûrun vâlidesi mezbûre Fâtıma Hatun bt. Mustafa mahzarında üzerine da‘vâ ve takrîr-i kelâm edüp müteveffâ-yı mezbûr Mehmed Çelebi b. Mustafa b. Abdullah zimmetinde vezin ve kıymet ve vukıyyesi beynimizde ma‘lûm üzüm ve sâir yemiş bahâsından ba‘de küllî hesâb yüz seksen guruş hakkım olup hatta müteveffâ-yı mezbûr hâl-i hayatında ve kemâl-i akıl [ve] sıhhatinde fevtinden on gün mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edüp kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden mahmiye-i İstanbul’da Küçük Mustafa Paşa mahallesinde sâkin Mehmed b. Ahmed ve Yemiş İskelesi’nde sâkin Halil b. Ali ve Ahmed b. İsmail li-ecli’ş-şehâde meclis-i şer‘a hâzırûn olup isre’l-istişhâd, fi[‘l-hakīka] müteveffâ-yı mezbûr Mehmed Çelebi b. Mustafa b. Abdullah’ın işbu müdde‘î-i mezbûr es-Seyyid İbrahim Çelebi’ye zimmetinde vezin ve kıyyesi beynlerinde ma‘lûm üzüm ve sâir yemiş bahâsından ba‘de külli’l-hesâb yüz seksen guruş deyni olup hatta müteveffâ-yı mezbûr hâl-i hayatında ve kemâl-i akıl [ve] sıhhatinde fevtinden on gün mukaddem meblağ-ı mezbûr zimmetinde işbu müdde‘î-i mezbûr es-Seyyid İbrahim’e vâcibü’l-edâ deyni olduğunu huzûrumuzda ikrâr ve bizi işhâd eyledi; biz bu husûsa bu vech üzere şâhidleriz; şehâdet dahi ederiz deyü her biri edâ-i şehâdet-i şer‘iye etdikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fî 14 min-Şevvali’l-mükerrem sene 1147. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, es-Seyyid Mehmed Çelebi b. es-Seyyid Mustafa, Yahya Efendi b. Mustafa, Hüseyin Çelebi b. Mehmed ve gayruhum.