Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 115 Hüküm no: 74 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Ali’nin küçük oğlu İbrahim’in vasîsi olan halası Rukiye Hatun’un 1 Muharrem 1144 – 1 Şevval 1147 dönemine ait muhasebesi Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Kiremidci Süleyman mahallesinde sâkin iken bundan akdem vefât eden Mehmed Efendi b. el-Hâc Ali’nin sulbî oğlu İbrahim’in hâl-i sıgārında vasîsi olan ammesi Rukiye Hatun bt. el-Hâc Ali’nin bin yüz kırk dört senesi Muharremi’l-harâm gurresinden bin yüz kırk yedi senesi Şevvali’l-mükerrem gurresine gelince otuz üç ayda vasiyye-i mezbûrenin mezbûr İbrahim taleb ve ma‘rifetiyle görülen muhâsebesi defteridir ki ber-vech-i âtî zikrolunur. Fi’l-yevmi’s-sânî min-Şevvali’l-mükerrem li-seneti seb‘a ve erba‘în ve miete ve elf. Vasiyye-i mezbûrenin ber-mûceb-i defter-i muhâsebe makbûz[u] olan 47.442 akçe Mezbûr İbrahim Çelebi’nin müddet-i mezbûrede akārâtından mezbûre Rukiye Hatun’un makbûzu 58.442 akçe Mezbûr İbrahim Çelebi’nin vâlidesi müteveffiye Safiye Hatun’un terekesinden mezbûre Rukiye Hatun’un makbûzu 26.400 akçe Mezbûr İbrahim’in babası müteveffâ-yı mezbûr Mehmed Efendi’nin mu[‘]takaları Mülâyim ve Emine fevt olduklarında terekelerinden mezbûre Rukiye Hatun’un ber-mûceb-i defter-i kassâm makbûzu 3.120 akçe Cem‘an yekûn 111.644 akçe Minhe’l-ihrâcât Mezbûre Rukiye Hatun[‘un] mezbûr İbrahim’in hâl-i sıgārında müddet-i mezbûrede nafaka-i mefrûza ve sâir umûruna masrûfu 44.121 akçe Harc-ı defter, kalemiye ve huddâmiye ve kaydiye 740 akçe Cem‘an yekûn 44.861 akçe Sahhu’l-bâkī Meblağ: 66.783 akçe Mezbûr İbrahim Çelebi hâl-i sıgārında vasîsi olan mezbûre Rukiye Hatun ile hesâbların görüp ba‘de’l-masârif altmış altı bin yedi yüz seksen üç akçe zuhûr etmekle meblağ-ı mezbûru merkūme Rukiye Hatun mezbûr İbrahim Çelebi’ye teslîm edüp mezbûre Rukiye Hatun’un zimmetini ibrâ ve ıskāt eylediği işbu mahalle şerh verildi.