Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 116 Hüküm no: 75 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Ali’nin reşit olan oğlu İbrahim’in, küçükken vasîsi olan halası Rukiye Hatun’un zimmetini vasîlik dönemine ait hesaplardan ibra ettiği Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Kiremidci Süleyman mahallesinde sâkin iken bundan akdem vefât eden Mehmed Efendi b. el-Hâc Ali’nin sulbî oğlu olup bulûğunu mukır ve mu‘terif olan İbrahim’in sin ve cüssesinin bulûğa tahammülü olup rüşdü olduğunu zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan mezbûr İbrahim meclis-i şer‘-i şerîf-i enverde ammesi ve vasiyyesi işbu râfi‘atü’l-kitâb Rukiye Hatun bt. el-Hâc Ali mahzarında ikrâr ve takrîr-i kelâm [27a] edüp ammem mezbûre Rukiye Hatun benim hâl-i sıgārımda vasiyyem olup hesâb ve kitâbımız görüldükde ber-mûceb-i defter-i muhâsebe mal-ı mevrûsumdan vasiyye-i mezbûre Rukiye Hatun’un masrûfunu muhber olduğum mikdârdan bâkī mal-ı mevrûsum olan altmış altı bin yedi yüz seksen üç akçeyi vasiyye-i mezbûre Rukiye Hatun bana def‘ ve teslîm ben dahi ber-vech-i muharrer yedinden bi’t-tamam ve’l-kemâl ahz u kabz edüp meblağ-ı mezbûrdan mezbûre Rukiye Hatun yedinde ve zimmetinde bir akçe ve bir habbe hakkım bâkī kalmayıp ba‘de’l-yevm babam müteveffâ-yı mezbûrdan ve sâir mirası bana intikāl edenlerin terekelerinden mezbûre Rukiye Hatun’un makbûz ve masrûfuna müte‘allika âmme-i de‘âvî ve mutâlebât ve eymân ve muhâsamâtdan mezbûre Rukiye Hatun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim; vechen mine’l-vücûh ve sebeben mine’l-esbâb da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis-aşer min-Şevvali’l-mükerrem sene 1147. Şuhûdü’l-hâl: Ömer Efendi b. Ahmed el-imâm, eş-Şeyh Ahmed Efendi b. Süleyman, İsmail Efendi b. el-Hâc Osman, el-Hâc Yusuf b. Abdullah, Osman Odabaşı b. Abdullah.