Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 124 Hüküm no: 82 Orijinal metin no: [28b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ördek Kasap Mahallesinde vefat eden Hatice Hatun bt. Abdülkadir’in vasiyetine oğlu Süleyman Çelebi b. Receb’i vasî tayin edildiği Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Davudağa mahallesinde sâkine olup mahmiye-i İstanbul’da Ördek Kasab mahallesinde bundan akdem müsâfereten vefât eden Hadîce Hatun bt. Abdülkadir’in sulbî kebîr oğlu olup ber-vech-i âtî vasîyy-i muhtâr olduğunu iddi‘â eden işbu râfi‘u’l-kitâb Süleyman Çelebi b. el-Hâc Receb meclis-i şer‘-i şerîf-i enverde müteveffât-ı mezbûrenin diğer [oğlu] olup ve terekesine vâzı‘u’l-yed olan Hüseyin Ağa mahzarında üzerine da‘vâ ve takrîr-i kelâm edüp vâlidem müteveffât-ı mezbûre Hadîce Hatun bt. Abdülkadir b. Abdullah fevtinden dört ay mukaddem, ben bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere techîz ve tekfînim ve düyûn-ı müsbetem edâ olundukdan sonra sülüsü ifrâz ve sülüs-i mezbûrdan üç bin akçe ile ıskāt-ı salâtım olunup fukarâya verile ve iki Mushaf-ı Şerîf alınup birer müstahıkkına verile ve üçer guruş ile iki hatm-i şerîf olunup rûhuma ihdâ eyleyeler ve bâkī sülüsümü dahi gelinim Afîfe nâm hatuna verile deyü vasiyet ve tenfîzine beni huzûr-ı Müslimînde vasîyy-i muhtâr nasb ü ta‘yîn edüp ben dahi ber-vech-i muharrer vesâyet-i mezbûreyi muvâcehesinde ba‘de’l-kabûl mezbûre Hadîce Hatun musırraten alâ-<<îshâ>>îsâihâ fevt olmağla [29a] tenfîz-i vesâyâ murâd eylediğimde mezbûr Hüseyin Ağa mâni‘ olur, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden sâlifü’z-zikr Ördek Kasab mahallesinde sâkin es-Seyyid el-Hâc Ahmed Ağa b. Mustafa ve Süleyman Çelebi b. İbrahim nâm kimesneler li-ecli’ş-şehâde meclis-i şer‘a hâzırân olup isre’l-istişhâd, fi’l-hakīka şahsı rü’yetimiz ile ma‘lûmumuz olan müteveffât-ı mezbûre Hadîce Hatun bt. Abdülkadir b. Abdullah fevtinden dört ay mukaddem, ben bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup sünnet-i seniyye üzere techîz ve tekfînim görüldükden sonra sülüsü ifrâz ve sülüs-i mezbûrdan üç bin akçe ile ıskāt-ı salâtım olunup <> fukarâya verile ve iki Mushaf-ı Şerîf <> iştirâ olunup fukarâya verile ve üçer guruş ile iki hatm-i şerîf olunup rûhuma ihdâ eyleyeler ve bâkī sülüsümü dahi gelinim Afîfe Hatun’a verile deyü vasiyet ve tenfîzine işbu oğlu müdde‘î-i mezbûr Süleyman Ağa’yı bizim huzûrumuzda vasîyy-i muhtâr nasb ve ta‘yîn edüp ol dahi ber-vech-i muharrer vesâyet-i mezbûreyi muvâcehesinde ba‘de’l-kabûl mezbûre Hadîce Hatun musırraten alâ-îsâihâ vefât eyledi; biz bu husûsa bu vech üzere şâhidleriz; şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Şevvali’l-mükerrem sene 1147. Şuhûdü’l-hâl: Mustafa Efendi b. Hüseyin, Ahmed Efendi b. Mustafa Efendi, es-Seyyid Mehmed b. es-Seyyid Mustafa, Yahya Efendi b. Mustafa, Hüseyin Çelebi b. Mehmed, İbrahim Çelebi b. Ömer.