Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 129 Hüküm no: 88 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun bt. İbrahim’den miras kalan evin Mehmed b. Hasan’a satıldığı Eceztü bimâ-fîhi Nemekahü’l-fakīru ileyhi azze şânühu Abdullah b. Mehmed el-müvellâ hilâfeten bi-Havâssı Kostantıniyye -gufire lehümâ- Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Baba Haydar Nakşibendî mahallesinde sâkine iken bundan akdem vefât eden Fâtıma Hatun bt. el-Hâc İbrahim’in hayatında sâkine olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun verâseti mukarrun-leh bi’n-neseb cihetinden karındaşı oğlunun oğulları Ebûbekir ve Ömer Çelebi ibney İbrahim’e münhasıra oldukdan sonra müteveffât-ı mezbûrenin sülüs-i vasiyyeti olup ve tashîh-i mes’eleleri üç sehimden i‘tibâr olunup sihâm-ı mezbûreden bir sehmi sülüs-i mezbûra ve birer sehmi dahi mezbûrân Ebûbekir ve Ömer Çelebi’den her birine isâbeti tahakkukundan sonra müteveffâ-yı mezbûrenin [30b] sülüsünü tenfîze bâ-hüccet-i şer‘iye vasîyy-i muhtârı olan el-Hâc Mustafa b. Hasan ile mezbûrân Ebûbekir <<Çelebi>> ve Ömer Çelebi meclis-i ma‘kūd-ı mezkûrda işbu râfi‘u’l-kitâb el-Hâc Mehmed b. Hasan tarafından husûs-ı âti’z-zikri tasdîka vekîl-i sâbitü’l-vekâlesi olan Mehmed Çelebi b. Mustafa mahzarında <> bi’l-vesâye ve bi’l-verâse ikrâr ve takrîr-i kelâm edüp müteveffât-ı mezbûrenin ile’l-vefât yedinde mülk ve hakkı idüği müsbet olup mahalle-i mezbûrede vâki‘ bir tarafdan Kurşuncu Ahmed Ağa menzili ve bir tarafdan müvekkil-i mezbûr el-Hâc Mehmed menzili ve bir tarafdan Abdülkerim menzili ve bir tarafdan tarîk-ı âm ile mahdûd iki bâb fevkānî oda ve dehliz ve bir matbah ve kenîf ve kuyu ve bir bâb tahtânî oda ve havluyu muhtevî menzili bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile müvekkil-i mezbûr el-Hâc Mehmed’e yüz seksen guruşa her birimiz bi’l-vesâye ve bi’l-verâse bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semeni olan meblağ-ı mezbûr yüz seksen guruşu vekîl-i merkūm el-Hâc Mustafa yedinden her birimiz bi-kadri’l-hısas alıp kabz eyledik; ba‘de’l-yevm menzil-i mahdûd-ı mezkûr müvekkil-i merkūm el-Hâc Mehmed’in mülk-i müşterâsı ve hakk-ı sırfı olmuşdur; keyfe mâ ve yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr el-Hâc Yusuf b. Abdullah ve [Muhzır] es-Seyyid Mehmed b. es-Seyyid Mustafa ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Ramazani’l-mübârek li-seneti seb‘a ve erba‘în ve miete ve elf. Şuhûdü’l-hâl: Ali Usta b. Mustafa, Ahmed Efendi b. Mustafa Efendi, es-Seyyid Memiş Ağa b. Mustafa, Memiş Beşe b. Mustafa, es-Seyyid Ahmed Ağa b. es-Seyyid Mehmed.