Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 127 Hüküm no: 87 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Abdullah’tan miras kalan evin, borçlarının ve küçük kızı Hanife’nin nafakasının karşılanabilmesi için Ali Efendi’ye satıldığı Husûs-ı âti’l-beyânın mahâllinde ketb ü tahrîri içün savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Arakıyecibaşı mahallesinde sâkin iken bundan akdem vefât eden el-Hâc Mehmed b. Abdullah’ın hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı [30a] mezbûrun verâseti zevce-i menkûha-i metrûkesi Zeyneb Hatun bt. Hasan ile sulbiye sagīre kızı Hanife’ye münhasıra ve tashîh-i mes’elesi sekiz sehimden i‘tibâr olunup sihâm-ı mezbûreden bir sehmi zevce-i mezbûre Zeyneb Hatun’a ve bâkī yedi sehmi sagīre-i mezbûre Hanife’ye isâbeti tahakkukundan sonra zâtı ta‘rîf-i şer‘î ile mu‘arrefe olan mezbûre Zeyneb Hatun ile sagīre-i mezbûrenin ceddi ve tesviye-i umûruna kıbel-i şer‘den mansûb vasîsi Hasan Ağa b. İbrahim meclis-i ma‘kūd-ı mezkûrda işbu râfi‘u’l-kitâb Ali Efendi b. ( ) mahzarında <> her biri bi’l-verâse ve bi’l-vesâye ikrâr ve takrîr-i kelâm edüp müteveffâ-yı mezbûrun tereke-i menkūlesi semeni düyûn-ı müsbetesine vefâ etmeyip ve sagīre-i mezbûrenin nafaka ve kisveye dahi eşedd-i ihtiyâcı olmağla emlâkinin şer‘an bey‘i lâzım gelmeğin müteveffâ-yı mezbûrun ile’l-vefât yedinde mülk ve hakkı idüği müsbet olup mahalle-i mezbûrede vâki‘ bir tarafdan Ali Ağa mülkü ve bir tarafdan mekteb ve bir tarafdan Ali Ağa bahçesi ve bir tarafdan tarîk-ı âm ile mahdûd iki bâb fevkānî oda ve bir matbah ve sofa ve dehliz ve tahtânî bir bâb oda ve ahır ve bir su kuyusu ve bahçeyi muhtevî mülk menzili bi’l-izni’ş-şer‘î sûk-ı sultânîde ve mecma‘ü’n-nâs olan mahallerde münâdîlerden Mustafa Beşe yediyle dört ay mikdârı müzâyede olunup ragabât-ı nâs bi’l-külliye munkatı‘a oldukdan sonra mezbûr Ali Efendi üzerinde dört yüz yirmi altı guruşda karâr edüp ziyâde ile tâlib-i âhar zuhûr etmediğinden mâ‘dâ meblağ-ı mezbûr menzil-i mahdûd-ı mezkûru[n] el-yevm semen-i misli idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın menzil-i mahdûd-ı mezkûru bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile meblağ-ı mezbûr dört yüz yirmi altı guruşa mezbûr Ali Efendi’ye her birimiz bi’l-verâse ve bi’l-vesâye mezbûr Ali Efendi’ye bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl <> eylediğinden sonra semen[i] olan meblağ-ı mezbûr dört yüz yirmi altı guruşu her birimiz bi-kadri’l-hısas merkūm Ali Efendi yedinden alıp kabz edüp ba‘de’l-yevm menzil-i mahdûd-ı mezkûr mezbûr Ali Efendi’nin mülkü olmuşdur; keyfe mâ yeşâ ve hasbemâ yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr İsmail ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 4 min-Zilka‘de sene 1147. Şuhûdü’l-hâl: Eş-şâhidûnü’s-sâbıkūn.