Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 133 Hüküm no: 90 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Şahbaz’ın Esed Ağa Vakfı’ndan kiralı Topçular köyündeki ahır ve bahçesinden, küçük oğlu Halil ile küçük torunu Mehmed Emin’e ait hisselerin başkasına devrine mahkeme tarafından izin verildiği Hurrire bi-ma‘rifeti men ü‘tümide-aleyh. Harrerehü’l-fakīru ileyhi sübhânehû Abdullah b. Mehmed el-müvellâ hilâfeten bi-Havâssı Kostantıniyye -gufire lehümâ- Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Davudağa mahallesinde sâkin iken bundan akdem vefât eden el-Hâc Ali b. Şahbaz’ın Havâss-ı Refî‘a kazâsına tâbi‘ Topçular nâm karyede vâki‘ merhûm Esed Ağa Vakfı’ndan icâreteyn-i ma‘lûmeteyn ile lede’l-ahâlî ve’l-cîrân ma‘lûmü’l-hudûd ve’l-müştemilât ahır ve bahçe ile’l-vefât taht-ı tasarrufunda olup ba‘de vefâtihî sulbî kebîr oğulları Mustafa ve Ahmed ve İbrahim’e ve sulbiye kebîre kızı Ümmügülsüm’e ve sulbî sagīr oğlu Halil’e intikāl-i âdî ile intikāl ettikten sonra mezbûr Mustafa dahi vefât edüp hissesi sulbî sagīr oğlu Mehmed Emin’e intikāl etmeğin zâtları ta‘rîf-i şer‘î ile mu‘arrefe olan işbu râfi‘ayi’l-kitâb sagīr-i mezbûr Halil’in vâlidesi ve tesviye-i umûruna mansûbe vasiyyesi Sâliha Hatun bt. Mehmed ile kezâlik sagīr-i mezbûr Mehmed Emin’in vâlidesi ve tesviye-i umûruna vasîsi olan Hanife Hatun bt. el-Hâc İbrahim meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp sâlifü’z-zikr ahır ve bahçe harâba müşrif olup hâsılı harcına vefâ etmediğinden mâ‘dâ kibâr-ı mezbûrûn dahi hisselerini âhara ferâğ murâd etmeleriyle sagīrân-ı mezbûrânın hisseleri ifrâz mümkün olmayıp bekāsı dahi sagīrân-ı mezbûrâna muzır olmağın ahır ve bahçede olan hisseleri kibâr-ı mezbûrûnun hisseleriyle ma‘an sûk-ı sultânîde ve mecma‘ü’n-nâs olan mahallerde müzâyede olunup ragabât-ı nâs bi’l-külliye munkatı‘a oldukdan sonra bedel-i misli ve ma‘rifet-i mütevellî ile âhara ferâğ ve bedeli istirbâh olunmak sagīrân-ı mezbûrân haklarında her vechile enfa‘ ve evlâ olmağın bedel-i misli ve ma‘rifet-i mütevellî [ile] âhara ferâğa kıbel-i şer‘den izin verilmek matlûbumuzdur dediklerinde vasiyyetân-ı mezbûretânın [31b] kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sâlifü’z-zikr ahır ve bahçede olan sagīrân-ı mezbûrânın hisselerini sûk-ı sultânîde ve mecma‘ü’n-nâs olan mahallerde müzâyede olunup ragabât-ı nâs bi’l-külliye munkatı‘a oldukdan sonra bedel-i misli ve ma‘rifet-i mütevellî [ile] âhara ferâğ ve bedeli istirbâh olunmak üzere vasiyyetân-ı mezbûretâna izin vermeğin mâ-vaka‘a bi’t-taleb ketb olundu. Fî 2 min-Zilka‘de sene 1147. Şuhûdü’l-hâl: el-Hâc Hüseyin b. Mehmed, Yahya Beşe b. İsmail, Mehmed Çelebi b. el-Hâc Salih, es-Seyyid Mehmed b. es-Seyyid Mustafa, el-Hâc İbrahim b. Mehmed, Ahmed Efendi b. Mustafa.