Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 134 Hüküm no: 91 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi b. Abdullah’tan miras kalan vakıf evin mülk olan binasının, Muhsine Hatun bt. İbrahim’e satıldığı Mâ-fîhi kemâ-yahvîhi Harrerehü’l-fakīru ileyhi sübhânehû azze şânühu Abdullah b. Mehmed el-müvellâ hilâfeten bi-Havâssı Kostantıniyye -gufire lehümâ- Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Câmi‘-i kebîr mahallesinde vâki‘ süknâsı salâya meşrûta vakıf menzilin mutasarrıfı olup bundan akdem vefât eden Hasan Çelebi b. Abdullah’ın verâseti zevce-i menkûha-i metrûkesi Emine Hatun bt. Mustafa ile sulbiye sagīre kızı Hadice’ye münhasıra ve tashîh-i mes’elesi sekiz sehimden i‘tibâr olunup sihâm-ı mezbûreden bir sehmi zevcesi mezbûre Emine Hatun’a ve bâkī yedi sehmi sagīre-i mezbûre Hadice’ye isâbeti tahakkukundan sonra sagīr-i mezbûrenin vâlidesi ve tesviye-i umûruna kıbel-i şer‘den mansûbe vasiyyesi olup zâtı ta‘rîf-i şer‘î ile mu‘arrefe olan mezbûre Emine Hatun meclis-i şer‘-i şerîf-i enverde işbu râfi‘atü’l-kitâb Muhsine Hatun bt. İbrahim tarafından husûs-ı âti’z-zikri tasdîka vekîl-i müsecceli olan Mehmed Ağa b. Şahin mahzarında bi’l-vesâye ve bi’l-verâse ikrâr ve takrîr-i kelâm edüp mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât zikr[i] mürûr eden vakıf menzilin ebniyesi işbu keşif hücceti nâtık olduğu üzere ile’l-vefât yedinde mülk[ü] olup <> tarafeynden îcâb ve kabûlü hâvî bey‘-ı bâtt-ı sahîh-i şer‘î ile müvekkile-i mezbûre <> Muhsine Hatun’a yüz guruşa bi’l-vesâye ve bi’l-verâse bey‘ ve temlîk ve teslîm edüp ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr yüz guruşu müvekkile-i mezbûre Muhsine Hatun yedinden bi’l-vesâye ve bi’l-verâse ahz u kabz eyledim; ba‘de’l-yevm ebniye-i mezbûre <> müvekkile-i mezbûre Muhsine Hatun’un mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 min-Şevvali’l-mükerrem sene 1147. Şuhûdü’l-hâl: Yahya Beşe b. Mustafa, Mehmed Ağa b. Mustafa, Mustafa Efendi b. Hüseyin, es-Seyyid Mehmed b. es-Seyyid Mustafa, Ahmed Efendi b. Mustafa Efendi.