Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 135 Hüküm no: 92 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. Abdullah’tan miras kalan evin, Mehmed Çelebi b. Abdurrahman’a satıldığı Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Bıçakcı Ferhad mahallesinde sâkine iken bundan akdem vefât eden Emine Hatun bt. Abdullah’ın hasran vârisi olduğu mütehakkık olan Mustafa Çelebi b. ( ) meclis-i şer‘-i şerîf-i enverde mahmiye-i İstanbul’da Keçeci Sırrı mahallesinde sâkin işbu râfi‘u’l-kitâb Mehmed Çelebi b. Abdurrahman mahzarında ikrâr ve takrîr-i kelâm edüp müteveffât-ı mezbûreden müntakıl mârrü’z-zikr Bıçakcı Ferhad mahallesinde vâki‘ etrâf-ı erba‘ası İshak Efendi veresesi mülkleri ve yine İshak Efendi Vakfı olan menzil ve tarîk-ı âm ile mahdûd fevkānî iki oda ve bir sofa ve dehliz ve bi’r-i mâ ve havluyu müştemil mülk-i mevrûs menzilimi cemî‘ tevâbi‘ ve levâhıkıyla tarafeynden îcâb ve kabûlü hâvî ve şurût-ı müfsideden ârî bey‘-ı bâtt-ı sahîh-i şer‘î ile mezbûr Mehmed Çelebi’ye yüz otuz beş guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr otuz beş guruşu mezbûr Mehmed Çelebi yedinden tamamen ahz u kabz eyledim; ba‘de’l-yevm menzil-i mahdûd-ı mezkûr mezbûr Mehmed Çelebi’nin [32a] mülk-i müşterâsı ve hakk-ı sırfı olmuşdur; keyfe mâ yeşâ ve hasbemâ yehtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 2 min-Zilka‘de sene 1147. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, Yahya Efendi b. Mustafa, Abdullah Efendi b. eş-Şeyh Mahmud, es-Seyyid Ahmed Efendi b. el-mukayyid, es-Seyyid Mehmed b. es-Seyyid Mustafa, Hüseyin Çelebi b. Mehmed, İbrahim Çelebi b. Abdurrahman, Abdullah Çelebi b. İsmail, Mehmed Çelebi b. ve gayruhum mine’l-huzzâr.