Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 138 Hüküm no: 94 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terkos nahiyesinin Karahalil köyü ahalisinden Mustafa Beşe b. Sinan’ın küçük çocukları Halil ve Rukiye’ye vasî tayini Havâss-ı Refî‘a kazâsı muzâfâtından Terkos nâhiyesine tâbi‘ Kara Halil nâm karyede sâkin iken bundan akdem vefât eden Mustafa Beşe b. Sinan’ın sulbî sagīr oğlu Halil ile sulbiye sagīre kızı Rukiye’nin tesviye-i emirlerine kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf, her vechile vesâyet uhdesinden gelmeğe kādir idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīrân-ı mezbûrânın ammileri işbu râfi‘u’l-kitâb Ahmed Beşe b. Sinan’ı hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīrân-ı mezbûrânın tesviye-i emirlerine vasî nasb ve ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımelerin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâmis-aşer min-Zilka‘deti’ş-şerîfe li-seneti seb‘a ve erba‘în ve miete ve elf. Şuhûdü’l-hâl: es-Seyyid Ahmed Ağa b. Mustafa Ağa, Osman Efendi b. Abdullah, Yusuf Beşe b. İbrahim, Ömer Kethudâ b. Abdullah, el-Hâc Süleyman b. Abdurrahman, Mehmed Beşe b. Süleyman.