Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 139 Hüküm no: 95 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terkos nahiyesinin Karahalil köyü ahalisinden Mustafa Beşe b. Sinan’ın küçük oğlu Mehmed’e vasî tayini Havâss-ı Refî‘a kazâsı muzâfâtından Terkos nâhiyesine tâbi‘ Kara Halil nâm karyede sâkin iken bundan akdem vefât eden Mustafa Beşe b. Sinan’ın sulbî sagīr oğlu Mehmed’in tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf, her vechile vesâyet uhdesinden gelmeğe kādir idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfi‘u’l-kitâb Hüseyin Ağa b. Osman Ağa’yı hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīr-i mezbûrun tesviye-i umûruna vasî nasb ve ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’t-târîhi’l-mezbûr li’s-seneti’l-merkūme. Şuhûdü’l-hâl: Eş-şâhidûnü’s-sâbıkūn.