Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 148 Hüküm no: 99 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun bt. Abdülkadir’den miras kalan evin Ahmed Ağa b. Abdullah’a satıldığı Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Aşcıbaşı mahallesinde vâki‘ Ahmed Ağa b. Abdullah’ın sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde medîne-i mezbûrede Davudağa mahallesinde sâkin iken bundan akdem vefât eden Hadîce Hatun bt. Abdülkadir’in verâseti sadrî kebîr oğulları Süleyman ve Hüseyin Ağa ile sadriye kebîre kızları Fâtıma ve Ümmügülsüm’e münhasıra ve tashîh-i mes’eleleri altı sehimden i‘tibâr olunup sihâm-ı mezbûreden ikişer sehmi oğulları mezbûrândan her birine ve birer sehmi kızları mezbûretândan her birine isâbeti tahakkukundan sonra mezbûrân Süleyman ve Hüseyin Ağa asâleten ve mezbûre Fâtıma Hatun’un zevci ve tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iye ile ârifân Abdullah Efendi b. Mehmed ve es-Seyyid Mehmed Ağa b. es-Seyyid Mustafa şehâdetleriyle şer‘an sâbit olan el-Hâc Selim Efendi b. Mehmed ile kezâlik mezbûre Ümmügülsüm’ün zevci ve tarafından vekîl olduğu zât-ı mezbûreyi ma‘rifet-i şer‘iye ile ârifân Mehmed Çelebi b. Abdullah ve es-Seyyid Mehmed Ağa b. es-Seyyid Mustafa şehâdetleriyle şer‘an sâbit ve sübût-i vekâletine hükm-i şer‘î lâhık olan Mehmed Haseki b. Abdullah meclis-i ma‘kūd-ı mezkûrda işbu râfi‘u’l-kitâb mezbûr Ahmed Ağa b. Abdullah mahzarında her biri bi’l-asâle ve bi’l-vekâle ikrâr ve takrîr-i kelâm edüp vâlidemiz müteveffât-ı mezbûre Hadîce Hatun’un ile’l-vefât yedinde mülk ve hakkı idüği müsbet olup sâlifü’z-zikr Davudağa mahallesinde vâki‘ bir tarafdan Havva Hatun menzili ve bir tarafdan Suyolcu Hüseyin Ağa menzili ve bir tarafdan Mehmed nâm kimesne menzili ve bir tarafdan tarîk-ı âm ile mahdûd dâhiliyesinde bir bâb fevkānî oda ve bir mâbeyn odası ve bir sofa ve tahtânî bir matbah ve bir bâb tahtânî oda ve bi’r-i mâ ve hâriciyesinde iki bâb fevkānî oda ve dehliz ve kenîf ve bir bâb tahtânî oda ve ahır ve samanlık ve kenîf ve zât-ı eşcâr-ı müsmire ve gayr-ı müsmire bahçeyi müştemil menzilden [ber-]tashîh-i mezbûr hisse-i şer‘iyelerimizi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile mezbûr Ahmed Ağa’ya beş yüz guruşa bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr beş yüz guruşu mezbûr Ahmed Ağa yedinden her birimiz bi’l-asâle ve bi’l-vekâle bi-kadri’l-hısas alıp kabz eyledik; ba‘de’l-yevm menzil-i mahdûd-ı mezkûru [mezkûr], merkūm Ahmed Ağa’nın mülk-i müşterâsı ve hakk-ı sırfı olmuşdur; keyfe mâ yeşâ ve hasbemâ yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr es-Seyyid Yaku[b] ve Muhzır es-Seyyid Mehmed Çelebi ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 17 min-Zilhicce sene 1147. Şuhûdü’l-hâl: İmâm Abdullah Efendi b. Mehmed, es-Seyyid Mehmed b. Davud, Mustafa Ağa b. Ali, Mustafa Bey b. Ahmed, Emir Ahmed Bey b. Abdullah, Mehmed Beşe b. Ali, es-Seyyid Ahmed b. Davud, Ahmed Çelebi b. Mehmed, Hüseyin Çelebi b. Abdullah ve gayruhum mine’l-huzzâr.