Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 150 Hüküm no: 100 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun bt. Mehmed’in küçük oğlu Mehmed’in, anasından miras kalan evdeki hissesinin Emetullah Hatun bt. Abdullah’a satıldığı Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Nişâncıpaşa mahallesinde sâkine iken bundan akdem vefât eden Emetullah Hatun bt. Mehmed’in verâseti zevc-i metrûkü Mehmed Bey b. Şükrullah ile vâlide[si] Havva Hatun bt. Şa‘bân’a ve sadrî sagīr oğlu Mehmed’e ve sadriye kebîre kızı <> Hamide’ye ve sagīre kızı Emine’ye münhasıra <> ve tashîh-i mes’eleleri kırk sekiz sehimden i‘tibâr olunup sihâm-ı mezbûreden on iki sehmi zevc-i merkūm Mehmed Bey’e ve sekiz sehmi mezbûre Havva Hatun’a ve on dört sehmi sagīr-i mezbûr Mehmed’e ve yedişer sehmi kızları mezbûretândan her birine isâbeti tahakkukundan sonra mezbûr Mehmed’in bâ-hüccet-i şer‘iye vasîsi olan Ahmed Çelebi b. Mehmed meclis-i şer‘-i şerîf-i enverde işbu râfi‘atü’l-kitâb Emetullah Hatun bt. Abdullah’ın zevci ve tarafından tasdîka vekîl-i şer‘îsi olan Mustafa Çelebi b. Osman mahzarında bi’l-vesâye ikrâr ve takrîr-i kelâm edüp müteveffât-ı mezbûrenin ile’l-vefât yedinde mülk ve hakkı idüği müsbet olup mahalle-i mezbûrede vâki‘ iki tarafdan Mustafa Çelebi mülkü ve bir tarafdan diğer Mustafa Çelebi mülkü ve bir tarafdan tarîk-ı hâs ile mahdûd fevkānî bir bâb oda ve bir bâb tahtânî oda ve bir kenîf ve bahçeyi muhtevî mülk menzilden verese-i kibâr hisselerini âhara bey‘ edüp sagīr-i mezbûrun menzil-i mahdûd-ı mezkûrda olan on dört sehim hissesi kābil-i taksîm olmadığından mâ‘dâ harâba müşrif olup hâsıl[ı] harcına vefâ etmeyip nafaka ve kisve-bahâya dahi eşedd-i ihtiyâcı olmağla hisse-i mezkûr bi’l-izni’ş-şer‘î sûk-ı sultânîde ve mecma‘ü’n-nâs olan mahallerde nidâ ve müzâyede olunup ragabât-ı nâs bi’l-külliye munkatı‘a oldukdan sonra müvekkile-i mezbûre Emetullah Hatun bt. Abdullah üzerinde kırk sekiz guruşda karâr edüp ziyâde ile tâlib-i âhar zuhûr etmeyip ve meblağ-ı mezbûr hisse-i mezkûrun el-yevm semen-i misli idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer oldukdan sonra tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile müvekkile-i mezbûre Emetullah Hatun’a sagīr-i mezbûrun on dört sehim hissesi semen-i misli olan <> meblağ-ı mezbûr kırk sekiz guruşa bi’l-vesâye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semen[i] olan meblağ-ı mezbûr kırk sekiz guruşu müvekkile-i mezbûre Emetullah Hatun yedinden tamamen ahz u kabz eyledim; ba‘de’l-yevm menzil-i mahdûd-ı mezkûrda olan sagīr-i mezbûrun on dört sehim hissesi müvekkile-i mezbûre Emetullah Hatun’un mülk-i müşterâsı ve hakk-ı sırfı olmuşdur; keyfe mâ teşâ ve hasbemâ tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Zilhicceti’ş-şerîfe li-seneti seb‘a ve erba‘în ve miete ve elf. Şuhûdü’l-hâl: Müezzin İbrahim b. Hüseyin, es-Seyyid İsmail b. Hamza, el-Hâc Yakub Odabaşı b. Abdülkerim, Osman Çelebi b. Hasan, Hasan Ağa b. İbrahim, Mustafa b. Ömer, Süleyman Çelebi b. Mustafa, Ali Çelebi b. Mustafa, Süleyman Beşe b. Mehmed, Hüseyin Çelebi b. Mehmed, es-Seyyid Mehmed b. es-Seyyid Mustafa.