Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 151 Hüküm no: 102 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. İbrahim’in, ev hissesini Hatice Hatun bt. Abdullah’a sattığı Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Câmi‘-i kebîr mahallesinde sâkin Mehmed Ağa b. İbrahim meclis-i şer‘-i şerîf-i enverde işbu râfi‘atü’l-kitâb Hadîce Hatun bt. Abdullah mahzarında ikrâr ve takrîr-i kelâm edüp medîne-i mezbûrede Musa Çavuş mahallesinde vâki‘ bir tarafdan İmâm Abdullah Efendi ve ba‘zan Kadifecizâde menzilleri ve bir tarafdan ba‘zan Süleyman Çelebi ve ba‘zan Dellâle Âişe Hatun menzilleri ve bir tarafdan tarîk-ı hâs ve bir tarafdan tarîk-ı âm ile mahdûd hâriciyesinde iki bâb oda ve bir köşk ve dâhiliyesinde üç bâb oda ve bir havuz ve bir matbah ve iki su kuyusu ve bir kenîf ve bahçeyi muhtevî mülk menzilden kırk sekiz sehim i‘tibârıyla yirmi sekiz sehim hissemi tarafey[n]den îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile mezbûre Hadîce Hatun’a iki yüz otuz beş guruşa bey‘ ve temlîk eylediğimde ol dahi ber-vech-i muharrer iştirâ [ve] temellük ve tesellüm ve kabûl eylediğinden sonra semeni olan meblağ-ı mezbûr iki yüz otuz beş guruşu mezbûre Hadîce Hatun yedinden bi’t-tamam ve’[l]-kemâl ahz u kabz edüp ba‘de’l-yevm menzil-i mahdûd-ı mezkûrda olan yirmi sekiz sehim hissem mezbûre Hadîce Hatun’un mülk-i müşterâsı ve hakk-ı sırfı olmuşdur; keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Zilhicceti’ş-şerîfe li-seneti seb‘a ve erba‘în ve miete ve elf. Şuhûdü’l-hâl: Mustafa Efendi b. İbrahim, Hüseyin Ağa b. Mustafa, Yusuf Bey b. Mustafa, İbrahim Bey b. Selim, İbrahim Çelebi b. Mehmed, Ahmed Çelebi.