Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 152 Hüküm no: 103 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahri Yusuf Bey b. Ali’nin küçük oğulları İbrahim ve Feyzullah’a nafaka tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Musa Çavuş mahallesinde sâkin iken bundan akdem vefât eden Bahri Yusuf Bey b. Ali’nin sulbî sagīr oğulları İbrahim ve Feyzullah’ın vâlideleri ve tesviye-i emirlerine bâ-hüccet-i şer‘iye vasîleri olan işbu râfi‘atü’l-kitâb Hadîce Hatun bt. Abdullah meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasîleri olduğum sagīrân-ı mezbûrânın nafaka ve kisve-bahâya eşedd-i ihtiyâcları olmağla babaları müteveffâ-yı mezbûrdan müntakıl mâllarından her birine kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasîyy-i mezbûrenin kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīrân-ı mezbûrânın babaları müteveffâ-yı mezbûrdan müntakıl mâllarından her birine yirmişer akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīrân-ı mezbûrânın nafaka ve kisve-bahâlarına harc ve sarfa ve lede’l-iktizâ istidâneye ve inde’z-zafer mâllarına rücû‘a vasîyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’s-sâlis min-Zilka‘deti’ş-şerîfe li-seneti seb‘a ve erba‘în ve miete ve elf. Şuhûdü’l-hâl: Mehmed Ağa b. İbrahim, Mustafa Ağa b. İbrahim, Yusuf Bey b. Mustafa, İbrahim Bey b. Selim, Hüseyin Ağa b. Mustafa ve gayruhum mine’l-huzzâr.