Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 164 Hüküm no: 115 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun bt. Ali’nin küçük çocukları Mehmed Emin ve Ayşe’ye anneanneleri Rukiye Hatun bt. Ali’nin vasî tayin edildiği Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Çavuş Kasım mahallesinde sâkine iken bundan akdem vefât eden Emetullah Hatun bt. Ali’nin sadrî sagīr oğlu Mehmed Emin ile sadriye sagīre kızı Âişe’nin babaları ve velîleri olan Ali Efendi b. Hasan meclis-i şer‘-i şerîf-i enverde sagīrân-ı mezbûrânın min-kıbeli’l-ümm ceddeleri işbu râfi‘atü’l-kitâb Rukiye Hatun bt. Ali mahzarında takrîr-i kelâm ve ta‘bîr ani’l-merâm edüp ba‘zı a‘zârım hasebiyle sagīrân-ı mezbûrânın umûrunu rü’yete iktidârım olmamağla sagīrân-ı mezbûrânın tesviye-i emirlerine mezbûre Rukiye Hatun vasî nasb ve ta‘yîn olunmak matlûbumdur dedikde hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīrân-ı mezbûrânın babaları ve velîleri mezbûr Ali Efendi rızâsıyla sagīrân-ı mezbûrânın tesviye-i emirlerine ceddeleri mezbûre Rukiye Hatun’u vasî nasb ve ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımelerin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’r-râbi‘ min-Muharremi’l-harâm li-seneti semân ve erba‘în ve miete ve elf. Şuhûdü’l-hâl: Ahmed Efendi b. Süleyman, es-Seyyid Hasan Çelebi b. Veli, Hasan Çelebi b. Ahmed, Ahmed Efendi b. …? Sarrâc.