Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 165 Hüküm no: 116 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ahmed’in küçük kızı Fatma’ya vasî tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Otakcıbaşı mahallesinde sâkin iken bundan akdem vefât eden Mustafa b. Ahmed’in sulbiye sagīre kızı Fâtıma’nın tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf, her vechile vesâyet uhdesinden gelmeğe kādir idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīre-i mezbûrenin li-ebeveyn karındaşı işbu râfi‘u’l-kitâb Mehmed Çelebi b. el-merhûm Mustafa’yı hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīre-i mezbûrenin tesviye-i umûruna vasî nasb ve ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Zilka‘deti’ş-şerîfe li-seneti seb‘a ve erba‘în ve miete ve elf. Şuhûdü’l-hâl: el-Hâc Mehmed Efendi b. İbrahim, el-Hâc Molla Mehmed b. el-Hâc Mehmed Efendi, Molla Hüseyin b. Mahmud, Osman Beşe b. Mehmed, es-Seyyid Mehmed b. es-Seyyid Mustafa.