Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 166 Hüküm no: 118 Orijinal metin no: [40a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Masik bt. Manik’in küçük oğlu Ovannes’e nafaka tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî- mahallâtından Topkapısı hâricinde Takyeci mahallesinde bundan akdem hâlike olan Masik bt. Manik nâm Nasrâniyenin sadrî sagīr oğlu Ovannes’in ceddesi olup mahalle-i mezbûrede mütemekkine zâtı ta‘rîf-i şer‘î ile mu‘arrefe olan işbu râfi‘atü’s-sifr Dorohi bt. Manuk meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp ceddesi olduğum bi-hakkı’l-hıdâne hacr ve terbiyemde olan Ovannes nâm sagīrin nafaka ve kisveye eşedd-i ihtiyâcı olduğundan mâ‘dâ murzı‘ası dahi olma[ma]ğla anası hâlike-i mesfûreden müntakıl mâlından kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde mesfûrenin kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî kimesneler ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri mezbûre Dorohi talebiyle sagīr-i mezbûrun nafaka ve kisve ve sâir levâzım-ı zarûriye ve murzı‘ası içün anası hâlike-i mesfûreden müntakıl mâlından beher yevm beşer para nafaka farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisve ve murzı‘asına ve havâic-i zarûriyesine harc ve sarfa ve lede’l-iktizâ istidâneye ve inde’z-zafer mâlına rücû‘a mezbûre Dorohi’ye izin vermeğin mâ-vaka‘a bi’t-taleb ketb olundu. Fî-gurreti min-Muharremi’l-harâm sene 1148. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, es-Seyyid Mehmed b. es-Seyyid Mustafa, Hüseyin Çelebi b. Mehmed, es-Seyyid Ahmed Efendi [b.] Abdurrahim.