Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 165 Hüküm no: 117 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Ahmed’in küçük kızı Fatma’ya nafaka tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Otakcıbaşı mahallesinde sâkin iken bundan akdem vefât eden Mustafa Çelebi b. Ahmed’in sulbiye sagīre kızı Fâtıma’nın karındaşı ve tesviye-i umûruna vasîsi olan işbu râfi‘u’l-kitâb Mehmed Çelebi b. el-merhûm Mustafa meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasîsi olduğum sagīre-i mezbûrenin nafaka ve kisve-bahâya eşedd-i ihtiyâcı olmağla babası müteveffâ-yı mezbûrdan müntakıl mâlından kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasîyy-i mezbûrun kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīre-i mezbûrenin babası müteveffâ-yı mezbûrdan müntakıl mâlından beher yevm ikişer para nafaka ve kisve-bahâ farz ve takdîr buyurup meblağ-ı mefrûz-ı mezbûru sagīre-i mezbûrenin nafaka ve kisve-bahâsına harc ve sarfa ve lede’l-iktizâ istidâneye ve inde’z-zafer mâlına rücû‘a vasîyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’s-sâlis min-Zilka‘deti’ş-şerîfe li-seneti seb‘a ve erba‘în ve miete ve elf. Şuhûdü’l-hâl: el-Hâc Mehmed Efendi b. İbrahim, el-Hâc Molla Mehmed b. el-Hâc Mehmed Efendi, Molla Hüseyin b. Mahmud, Osman b. Ahmed, es-Seyyid Ahmed b. es-Seyyid Mustafa.