Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 172 Hüküm no: 123 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Hasan’ın küçük oğlu Süleyman’a nafaka tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Nişâncıpaşa mahallesinde sâkine iken bundan akdem vefât eden Âişe Hatun bt. Hasan’ın sadrî sagīr oğlu Süleyman’ın babası ve tesviye-i umûruna bâ-hüccet-i şer‘iye vasîsi olan işbu râfi‘u’l-kitâb Osman Bey b. Hasan meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasîsi olduğum sagīr-i mezbûrun nafaka ve kisve-bahâya eşedd-i ihtiyâcı olmağla anası müteveffât-ı mezbûr[e]den müntakıl [mâl-ı] mevrûsundan kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasîyy-i mezbûrun kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīr-i mezbûrun vâlidesi müteveffât-ı mezbûr[e]den müntakıl mal-ı mevrûsundan beher yevm ikişer para nafaka ve kisve-bahâ farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisve-bahâsına harc ve sarfa ve lede’l-iktizâ istidâneye ve inde’z-zafer mâlına rücû‘a vasîyy-i mezbûr Osman Bey’e izin vermeğin mâ-vaka‘a bi’t-taleb ketb olundu. Fî 19 min-Rebî‘ülevvel sene 1148. Şuhûdü’l-hâl: Mustafa Efendi b. Hüseyin, el-Hâc Halil b. Ahmed, Hasan Beşe b. Hüseyin, es-Seyyid Mehmed b. es-Seyyid Mustafa, Ahmed Çelebi b. Ali, Mehmed Ağa b. Yusuf.