Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 172 Hüküm no: 124 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anadolu’da Karakulak denilen yerde vefat eden Musahip Paşazâde Abdullah Bey’den miras kalan ½ ev hissesinin, adı geçenin eşi ve diğer ½ hissenin sahibi Rukiye Hanım bt. Ahmed Efendi’ye satıldığı Husûs-ı âti’l-beyânın mahâllinde ketb ü tahrîri iltimâs olunmağın bu fakīr medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Kiremidci Süleyman mahallesinde sâkin iken bundan akdem vilâyet-i Anadolu’da Karakulak nâm mevzi‘de bi-kazâillâhi te‘âlâ vefât eden Musâhib Paşazâde Abdullah Bey’in mahalle-i mezbûrede vâki‘ hayatında sâkin oldukları menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mûmâ-ileyh Abdullah Bey’in verâseti zevce-i menkûha-i metrûkesi Rukiye Hanım bt. Ahmed Efendi ile sulbiye kebîre kızı Emine Hanım’a ve sulbiye sagīre kızı Hadîce Hanım ile zevcesi mezbûre Rukiye Hanım’ın batnında müstebîn hamle münhasıra ve tashîh-i mes’eleleri otuz iki sehimden i‘tibâr olunup sihâm-ı mezbûreden dört sehmi zevcesi mezbûre Rukiye Hanım’a ve yedişer sehmi kızları mezbûretândan her birine ve on dört sehmi haml-i merkūma isâbeti tahakkukundan sonra merkūme Emine Hanım’ın tarafından husûs-ı âti’l-beyânda vekîl-i müsecceli Mustafa Efendi b. Abdülkadir ile sagīre-i mezbûre Hadîce Hanım’ın tesviye-i umûruna ve haml-i mezbûrun hisse-i mevkūfesini ahz u kabza [ve] zabt u hıfza kıbel-i şer‘den vasî nasb olunan sagīre-i mezbûre Hadîce Hanım’ın ammisi Ömer Bey b. el-mezbûr Mehmed meclis-i ma‘kūd-ı mezkûrda umdetü’l-muhadderât zevcesi mezbûre Rukiye Hanım mahzarında merkūm Mustafa Efendi vekâleten ve mûmâ-ileyh Ömer Bey vesâyeten ikrâr ve takrîr-i kelâm edüp müteveffâ-yı mûmâ-ileyh Abdullah Bey’in tereke-i menkūlesi semeni düyûn-ı müsbetesine vefâ etmediğinden mâ‘dâ sagīre-i mezbûrenin dahi nafaka ve kisveye eşedd-i ihtiyâcı olmağla emlâkinin şer‘an bey‘i lâzım gelmeğin müteveffâ-yı mûmâ-ileyhin ile’l-vefât yedinde mülk ve hakkı idüği müsbet olup mahalle-i mezbûrede vâki‘ bir tarafdan ba‘zan İsmail Çelebi ve ba‘zan Hasan Çelebi menzillleri ve bir tarafdan İbrahim Ağa menzili ve bir tarafdan bostan ve bir tarafdan tarîk-ı âm ile mahdûd dâhiliyesinde tahtânî bir bâb oda ve bir sofa ve bir oda ve bir taş oda ve bir mahzen ve bir hamam ve câmekân odası ve bir matbah ve üstünde bir oda ve kapı üstünde iki fevkānî oda ve bir köşk ve yine kapı dâhilinde bir bâb tahtânî oda ve bir kilâr ve mahtabhâne ve bi’r-i mâ ve kenîf ve zât-ı eşcâr-ı müsmireli bahçe ve hâriciyesinde bir bâb fevkānî oda ve bir camlı köşk ve bir kahve odası ve bir sofa [42b] ve zât-ı eşcâr-ı müsmireyi hâvî bahçe ve dâhiliyede bir camlı köşk ve bir fıskıye ve zât-ı eşcâr-ı müsmire ve gayr-ı müsmireli bahçe ve ittisâlinde bahçe ve bi’r-i mâ ve su hazînesi ve sokak tarafında ma‘lûmü’z-zirâ‘ arsa-i hâliye ve bir battal bi’r-i mâ‘ı müştemil mülk menzilin nısfı müteveffâ-yı mûmâ-ileyh Abdullah Bey’in mülkü ve nısf-ı âharı zevcesi mezbûre Rukiye Hanım’ın mülkü olmağla müteveffâ-yı mûmâ-ileyhin nısf menzili bi’l-izni’ş-şer‘î sûk-ı sultânîde ve mecma‘-ı nâs olan mahallerde nidâ ve müzâyede olunup ragabât-ı nâs bi’l-külliye munkatı‘a oldukdan sonra zevcesi mezbûre Zevce [Rukiye] Hanım üzerinde bin iki yüz guruşda karâr edüp ziyâde ile tâlib-i âhar zuhûr etmediğinden mâ‘dâ nısf menzil-i mahdûd-ı mezkûrun meblağ-ı mezbûr bin iki yüz guruş el-yevm semen-i misli idüği zeyl-i vesîkada muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın nısf menzil-i mahdûd-ı mezkûru bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile meblağ-ı mezbûr bin iki yüz guruşa mezbûre Rukiye Hanım’a her birimiz bi’l-vekâle ve bi’l-vesâye bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr bin iki yüz guruşu müteveffâ-yı mûmâ-ileyh Abdullah Bey’in düyûn-ı müsbetesini edâ içün mezbûr[e] Rukiye Hanım yedinden bi’t-tamam ve’l-kemâl alıp kabz eyledik; ba‘de’l-yevm nısf menzil-i mahdûd-ı mezkûr mezbûre Rukiye Hanım’ın mülk-i müşterâsı olmuşdur dedikde gıbbe’t-tasdîkı’ş-şer‘î mahâllinde mâ-vaka‘a bi’t-taleb ketb olundu. Fî 20 Rebî‘ülevvel sene 1148. Şuhûdü’l-hâl: Mustafa Efendi b. Hüseyin, Ali Bey b. Süleyman Bey, İbrahim Ağa b. Mehmed, Ahmed Ağa b. Mehmed, Hasan Çelebi b. Ahmed, Mustafa Efendi b. Abdülkadir.