Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 192 Hüküm no: 135 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mumcu Hasan Beşe b. Zeynel’in mumculuk sanatına ait alet ve malzemelerinin, Mumcu Hasan Beşe b. Ali’ye satıldığı Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Sof[u]lar mahallesinde sâkin iken bundan akdem vefât eden Mumcu Hasan Beşe b. Zeynel’in medîne-i mezbûrede mumcular kârh[â]nesine varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun verâseti zevce-i menkûha-i metrûkesi Sâliha Hatun bt. Mehmed ile mezbûre Sâliha Hatun’un batnında müstebîn hamle münhasıra olduğu şer‘an zâhir ve müte‘ayyin oldukdan sonra haml-i mezbûrun hisse-i mevkūfesini ahz u kabz [ve] zabt u hıfza kıbel-i şer‘den vasî nasb olunan Molla Ali b. İbrahim vesâyeten ve mezbûre Sâliha Hatun tarafından vekâleten meclis-i ma‘kūd-ı mezkûrda mumcu tâifesinden işbu râfi‘u’l-kitâb diğer Hasan Beşe b. Ali mahzarında bi’l-vesâye ve bi’l-vekâle ikrâr ve takrîr-i kelâm edüp beyne’l-hiref gedik i‘tibârıyla müteveffâ-yı mezbûrun ile’l-vefât taht-ı icâresinde olan kârh[â]ne-i mezbûrede vâki‘ şem‘-i revgan ve ma‘lûmü’l-kıyye penbe fitili ve hatab ve tezgâh ve sandık ve kazgan ve sâir âlât-ı mu‘ayyene-i mevcûdesi hırfet-i mezbûrenin kethudâları ve yiğitbaşıları ve müsin [ve] ihtiyâr ustaları ve zeyl-i kitâbda muharrerü’l-esâmî Müslimînin tahmîn ve takvîmleri ve haberleri üzere kırk dört bin akçe semen-i misli olduğu lede’ş-şer‘ zâhir ve mezbûr Hasan Beşe iştirâya tâlib ve râgıb olmağla eşyâ-i muharrere-i mezkûreyi tarafeynden îcâb ve kabûlü hâvî bey‘-ı kat‘î ile semen-i misli olan meblağ-ı mezbûr kırk dört bin akçeye mezbûr Hasan Beşe[‘ye] bi’l-vesâye ve bi’l-vekâle bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra zimmetinde edâsı lâzım gelen meblağ-ı mezbûr kırk bin akçenin on altı bin akçesini müteveffâ Yusuf Beşe’nin eytâmı mâlından bâ-temessük müteveffâ-yı mezbûr Hasan Beşe’nin istidâne ve kabz ve masârifine sarfla istihlâk eylediği on altı bin akçeyi kable’l-edâ fevt olmağla tereke-i vâfiyesinden edâsı iktizâ eden meblağ-ı mezbûr on altı bin akçe deyninin edâsından sonra meblağ-ı bâkī-i mezbûr [47a] yirmi dört [bin] akçeyi hâzırûn bi’l-meclis olan ma‘lûmü’l-esâmî düyûn-ı müteferrikasına vermek üzere havâle eylediğimde ol dahi vech-i meşrûh üzere ba‘de’l-kabûl merâsimini edâya ta‘ahhüd eyledi dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr Mehmed Çelebi ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Cumâdelûlâ li-seneti semân ve erba‘în ve miete ve elf. Şuhûdü’l-hâl: Fahrü’l-kuzât Mehmed Necib Efendi b. Mustafa, el-Hâc Mahmud Ağa b. Mustafa Kethudâ, Bektaş Beşe b. Ali, Yakub Beşe b. Hüseyin, Ali Beşe b. Osman, Ahmed Beşe [b.] Ali.