Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 195 Hüküm no: 137 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun bt. İbrahim’in eşi ve varisi Mehmed Beşe b. Mustafa’nın, miras hususunda diğer varis Hatice Hatun’un zimmetini ibra ettiği Husûs-ı âti’l-beyânın mahâllinde ketb ü tahrîri içün savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Baba Haydar Nakşibendî mahallesinde sâkine iken bundan akdem vefât eden Safiye Hatun bt. İbrahim’in hayatında sâkine olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffât-ı mezbûrenin verâseti zevc-i metrûkü Mehmed Beşe b. Mustafa ile li-üm kız karındaşı Hadîce Hatun bt. İbrahim’e münhasıra olduğu şer‘an zâhir ve müte‘ayyin oldukdan sonra mezbûr Mehmed Beşe meclis-i ma‘kūd-ı mezkûrda müteveffât-ı mezbûrenin kız karındaşı olup ve terekesine bi’l-verâse vâzı‘atü’l-yed olan işbu râfi‘atü’l-kitâb mezbûre Hadîce Hatun mahzarında bi’l-verâse ikrâr ve takrîr-i kelâm edüp zevcem müteveffât-ı mezbûre Safiye Hatun’un terekesi tahrîr ve ba‘de ihrâci’l-masârifi ve’d-düyûn ber-mûceb-i defter-i kassâm-ı askerî bi-hasebi’l-irsi’ş-şer‘î hisseme isâbet eden on bin sekiz yüz yetmiş bir akçeyi mezbûre Hadîce Hatun bana def‘ ve teslîm ben dahi yedinden tamamen ahz u kabz edüp ba‘de’l-yevm mezbûre Hadîce Hatun ile husûs-ı mezkûra müte‘allika âmme-i de‘âvîden zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr es-Seyyid Yakub ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 23 min-Cumâdelûlâ sene 1148. Şuhûdü’l-hâl: Halil Ağa b. Mehmed, İbrahim Çelebi Ahmed, İbrahim Çelebi b., Ahmed Bey b. Hasan, el-Hâc Mustafa b. Hüseyin, es-Seyyid Ahmed b. es-Seyyid Mehmed.